Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Van die gheschiedenisse vanden Iare van.xvc.ende.xxx.

Dit Iaer beghinnende te kersmisse wast eenen slappen winter, anders dant recht te Kersmisse vroos.x.oft.xij.dagen, so datmen ij.oft.iij.dagen vp die vesten vander steden ginc voort soe en vroost noch en sneeudet noch hagheldet niet meer, so dat int eerste vanden Meerte alle pruymboomen ende kriecboomen wit stonden ghebloesemt, ende den brem hadde bloemen inden Maerte, ende voort alle bomen na den April ende tbeghinsel vanden Meye was seer hart ende cout, so dat vele late vruchten verdoruen, ne maer was noch eenen redelicken somer van allen grane.

¶ Ontrent Lichtmis soe bernde een dorp af gheheeten Ieteghem, van eenen bouue die twist hadde teghen dye Schouteeten, ende stack des Schouteetens huys aen, ende verbernde so voort alle het dorp.