Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Hoe ende in was manieren die Keyserlijcke maiesteyt ontseyt was van twee Coninghen]

Hoe ende in was manieren die Keyserlijcke maiesteyt ontseyt was van twee Coninghen, te weten vanden Coninck van Vranckerijcke, ende vanden Coninck van Inghelant, ende hoe ende in wat manieren die keyserlicke maiesteyt daer vp antwoorde metten monde ende in scriptis.

¶ Dat.xij.Capittel.

[fol. xxxvij.r]

INt iaer ons heeren duysent vijf hondert ende achtentwintich, die Keyserlicke maiesteyt sijnde te Bourges in Spaengien, quam dye Heraut vanden Coninck van Vranckerijcke, ende dye Heraut vanden Coninck van Inghelant, ende seyde inden name van hem beyden. Heere confirmerende alle rechten inuiolentelick ghehouden byden Keyserlijcken statuyten uwer voorsaten etc. Wy begheren datmen ons lieden wil hooren dye beuelen van onsen heeren ende Coninghen, uwer maiesteyt te declareren ende daer antwoort vp te gheuen, ende noch voort dat uwer maiesteyt belieuen wil ons te gheuene vry gheleye door v landen te passerene weder int onse Ende die heraut van Vranckerijcke seyde dat sijn meester die Coninck hem beuolen hadde te segghen, dat hy droeue was dat die grote onvrientscap soude weder commen in sijnen alder eersten ganc, niet alleen tusschen v en die uwen, ende tusschen hem ende den sijnen, maer alle Kerstenrijc duere met groten bloetstortinghe. Ende aenghesien dat mijn meester die coninck van Vranckerijcke hem seer gheern voeghen wil tot alle redelijcke ende rechtelijcke saken, maer my dunct dat nochtans die orloghe niet cesseren en wilt, want v volck heeft dye helege stadt van Roomen oueruallen ende berooft ende den Vicarium Gods gheuanghen ende ghepriueert van sijnder vryheyt. Ende ghy houdt oock sijn kinderen gheuanghen in sijn ostagie, ende hi heeft nochtans dicke ghepresenteert costumelic rantsoen te betalen. Ende oock en behoort v nyet te houden aen die gheloften die hi v bi foortsen gheloeft heeft, want dat ware hem onmoghelick om doen, ende ghi sijt die cause

[fol. xxxvij.v]

van dye groote orloghe tusschen v beyden ende dye al Christenrijck door es. Die Coninck van Inghelant heeft goeden paeys met hem ghesloten, ende die Venechianen Florentinen, die hertoghe van Berri ende meer ander sijn verbonden met mijnen here den coninck. Aldus ontbieden si v ghelijc u viant te sijn nu voort aen, ende reuoceren alle alianchien hier voortijts met v ghemaect, ende sullen v ende uwen landen beschadighen totter tijt toe dat ghi weder om leueren sult sijn kinderen om eenen redelijcken rantsoen, ende den paeus weder in sijnen auctoriteyt, ende den coninck van Inghelant betaelt hebt sijn ghelt, so es te vreden mijn heere die coninck van Vranckerijcke ende dye coninck van Inghelant, dat die cooplieden van beyde sijden sullen moghen haer goeden elck dat sijne salueren binnen veertich daghen nae den date. ghesloten ende ghemaect den.xi.sten dach Nouembris. Int iaer ons heeren duysent vijfhondert ende.xxviij.