[Vpten.xiiij.sten dach van Meerte en den xi.sten dach van April]
INt iaer alsmen screef duysent vijfhondert ende vijuentwintich wert ghemaect ende gheconfirmeert dat huwelijc tusschen des Conincx suster van Poortegale, ende Kaerlen den edelen ende hooch gheboren Keyser, welcke Coninck van Poortegale was des ouden conincx sone van Poortegale, dye daer ghetrout hadde die oudtste suster van onsen Keyser Leonora ghenaemt. Ende als die oude Coninck doot was, soe wert die sone Coninck in sijns vaders stede, die daer ooc had ghetrout des keysers ioncste suster Katherina. Ende als dit huwelijck dus vanden Keyserlijcken maiesteyt ende van des conincx suster ghemaect was, so wert daer ghereeschap ghemaect van allen staten van heeren, ende hebben die edele coninghinne ouerghebracht verchiert met huytnemende costelijcheyt ende seer groot gheselschap, ende si quamen in Sibilien, daer si seer hoochlick met seer groter triumphen ontfanghen was. Ende alle die heeren quamen ende custen elc van hemlieden bysundere haer hant, ghelijc daer in die landen dye castuyme es. Ende so quam die edel wel gheboren princersse vpten.xiiij.sten dach van Meerte int iaer voorseyde in die stadt van Macharien in dat conincrijc van Sibilien dye seer rijckelijck ghecleet was met witten atlas, verchiert met peerlen, ende costelicke ghesteenten, so dat niet te werderen noch te schatten en was die costelicheyt ende wtnementheyt der cleederen, ende si wert seer eerlijcken ende triumphelijcken ontfanghen vanden bisschop van Toleten ende vanden anderen heeren ende grote meesters des rijcx, ende van al den edelen van Castilien, die alle quamen ende custen haer hant ende hietense seer feestelijc willecome. Doen wert der Keyserlijcker maiesteyt die tijdinghe ghedaen dat sijn bruyt die edel princersse van Poortegale, die bloeme der vrouliker figueren ouer ghecommen was in Sibilien, so dat hi hem bereyde ende quam met groten state in Sybilien den xi.sten dach van April, int Iaer voorseyde van xxv.daer hijse seer minlijc ontfanghen heeft met seer groten state ende costelicheyt Ende nae dat hijse dus ontfanghen hadde soe es daer ghecommen die eerweerdighe Cardinael ende Eertsbisschop van Toleten met veel ander bisschoppen, Abten ende gheestelijcke Prelaten met groten state totter feesten. Ende dye Cardinael gafse te samen in die coninclike sale, ende die Eertsbisschop dede die misse nae middernacht, ende daer ontfinghen si dat heleghe Sacrament, ende doen worden sy ghetrout ende den bant wert daer ghebonden, daer seer groote blijscap bedreuen wert ende triumphe, ende open hof veel daghen lanck.etc. Ende daer was gheordonneert een seer costelijc bancket na der trouwinghe smorghens inden dagheraert, waer in waren banckenterende seer vele edele ende moghende Princhen ende heeren, ende daer naer so ordonneerdemen een seer schoone steecspel, waer in schoone sticken van wapenen ende vromicheden bedreuen waren, welc hier te lanc ware hier int langhe te verclarene.
¶ Des sondaechs nae Sacraments dach soe dede die Factuer van Poortegale processye draghen, misse singhen, dye groote clocke luyden, om dat hueren Coninc den Turck af ghenomen hadde meer dan hondert schepen, die sijn Eylant nemen wouden dat hi gheuonden hadde. Sy vierden ende bedreuen seer groote ghenouchte, ende hueren schepen oock van dier ghelijcke ligghende int watere voor der stadt van Antwerpen schoten met allen seere door dese blijde tijdinghe.
¶ In Iulio doen werdt die valuacie ghelesen, ende vele vreemde munten verboden dwelck niet ghehouden en wart.
Auteursrechtvrij
