Die keyserlicke maiesteyt antwoorde den voorschreuen Guienna, Heraut vanden Coninck van Vranckerijcke, die woorden hier nae volghende.
Ic heb verstaen tgeen dat ghy van v smeesters weghen den Coninc, hier hebt ghelesen. Ende het verwondert mi, dat hy my ontseyt, sijnde mijn gheuanghen van rechtueerdich orloech, ende houdende ben dat ick hem gheloeft hebbe, van rechts weghen en mach hijs niet doen. Dat dunct mi nyeu sijn, van hem ontseyt te sijn, want es.vi.oft.vij.iaer, dat hy altijt met my orloecht, sonder oeyt ontseyt te hebben, ende noch met die gracie gods, so heb ic my van hem gheweert, als yeghelic ghesien heeft, sonder dat hi mi onseyde oft waerschoude, ende ouerdacht die rechtueerdicheyt, in welcke ick mi heb ghestelt, daer en meyne ic God nyet mede hebben mesdaen. Ick hope nv ghi mi waerschout, nv wil ic mi noch veel beter ter weere stellen, bi alsoo, dat mi die coninck v heere gheen schade doen en sal, want nv hy my ontseyt, nv houde ick my half voor versekert.
Auteursrechtvrij