Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Verraderye van Doornicke.

Inden somer dees selfs iaers so ghebuerdet datter.xv.oftxvi.al meest poorters van der stadt van Doornicke, een verraetschap toe ghemaect hadden om te leueren die stadt voorseyde, inden handen vanden Coninck van Vranckerijcke. Dit verraetscap quam huyte, ende die princepale wierden gheuanghen ende die melden die ander, ende wierden al gherecht, maer die princepale waren tot achter nae ghehouden ende gheuierendeelt vp alder sielen dach. Daer na om dit verraetschap wille so wasser gheordonneert dat in alle vergaderinghe, als bruloften wtuaerden, ende ander der ghelijcke dinghen souden altoos daer present sijn eeneghe vanden Saudeniers om te hooren watmen daer seyde ende dede.

¶ Opten.viij.sten dach van Nouembre ghinc men processie, louende ende danckende den almoghenden god, om dat den hertoghe van Septen castrum die des Turcx vrient was, wert veruolcht int Lant van Septen castrum, dat hi wilde behouden voor den Turc, maer sijn eyghen volc geleyden hem, ende wilden hem den coninck leueren, ende gauen haer selue onder die ghehoorsaemheyt vanden coninck. Doen was Ferdinandus Coninck van Hongherien, van Bemen, van Dalmacien, van Croacien, Eertshertoghe van Oostenrijcke etc.