Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Vanden Tractate des Conincx van Vranckerijcke, ende der Keyserlijcker maiesteyt.

NAe dat Franciscus den Coninc van Vranckerijcke deerste van dien name, in eenen openbaren strijt int velt gheuanghen wert van skeysers capiteynen met veel edelen des Landts van Vranckerijcke, daer van sijnen volcke wel acht duysent verslaghen waren, met sommeghe groote heeren ende Princhen, soe werdt hy ouergebracht in Spaengien met sommeghe heren als gheuanghen, ende daer gheleuert der Keyserlijcker maiesteyt, om met den Coninck sijnen wille te doene. Ende dit was int iaer ons heren, alsmen screef duysent vijf hondert ende vijuentwintich vp Sinte Matthijs dach, ende int iaer van sessentwintich wert vp condicien een tractaet tusschen den Coninck van Vranckerijcke ende dye Keyserlijcke maiesteyt ghemaect te Madril in die maent van Ianuario, so wel om paeys eewelijck gheduerende te hebbene als om verlost te werden. So gaf die voor seyde coninck van Vranckerijck ouer dat

[fol. xxxvi.v]

Conincrijck van Napels, Thertoochdom van Mylanen ende van Ienuen, dye stadt van atrecht, Doornicke met haer toebehoorten Schelt oock quijt alle die actien die hi ghehadt heeft in Vlaendren ende Artoys, ende in alle landen den Keyser toebehoorende, ende in allen den landen des Keysers in die contreyen van Vranckerijck, ende gaf ouer dat Hertoochdom van Bourgoengien met al, so dat hertoghe Karel beseten hadde, ende gaf ouer Hesdijn. Ende hi soude restitueren den hertoghe van Bourbon alle sijn goeden ruerende ende onruerende, ende alle die goeden hanghende den tijt so langhe als hy huyt Vranckerijc gheweest hadde. Ende hi soude los laten den Prinche van Aranien, ende alle ander gheuanghen ter eender sijden, ende ter ander sijden vry laten gaen. Ende die coninck abandonneert den hertoge van Wertenborch, ende daer was ordonnancie ghemaect van heer Robrecht de la marche, ende aengaende den Hertoghe van Ghelre, dat hi dat lant besitten soude sijn leuen lanc, ende naer sijn doot der Keyserlijcker maiesteyt toe commen, ende ghecreech die hertoge eeneghe wetteghe kinderen, die sal die Keysere elders gracelic versien. Ooc soude die Coninck van Vranckerijcke den keyser leenen om sijn reyse te doene in Italien waer dat hi wilde alle sijn armeye ter zee, ende.vi^c.lancien, ende.vi.duysent voetknechten voor een half iaer te betalen. Ende daer was ghesloten thuwelijc tusschen den coninc ende Leonora die wedewe van Portegael, die hebben soude twee hondert duysent croonen, ende dye Graefschapen van Malcouuez tesserois, ende Bar vp die Seine naer die versakinge van allen successien. Ende om dese tractaten te volbrenghen moeste hi selue in Vranckerijc sijn in sijnen persone, soe moeste hi voor ende eer seynden in ostagie in die handen van den Keyser, den Dolphijn van Vranckerijc ende sijnen tweesten sone. Ende als dye coninc voldaen heeft salmen hem duechdelijc sijn kinder weder om seynden etc.

¶ Opten eersten dach.Anno.xxvij.wardt die valuacie huyt ghelesen, dye hueren soude tot inden Maerte, om daer en binnen alle schulden ende wederschulden betaelt te moghen worden.

[Opten eersten dach van Maerte]

¶ Opten eersten dach van Maerte wart die valuacie in allen landen ende steden huyt ghelesen ghelijc si voortijden gheweest hadde, ende daer wart seer grote peyne vp ghesedt Ende alle rechters ende dienaers onder den Keyser moesten ten heleghen sweeren dat te onderhouden ende te doen onderhouden.

[In die maent van Iunius den.x.sten dach]

¶ In die maent van Iunius den.x.sten dach doen vierdemen ende ghinck processie ende dancte god vander victorie die de.Ke.Ma.ghehadt hadde. Ooc om dat hem God verleent hadde eenen sone, die gheboren was inden Meye des anderen daechs naer Sinxen, ende was ghenaemt Maximiliaen na sijnen grootvader.