Die coninclike doorluchticheyt van Bemen, Eertshertoghe Ferdinandus etc. Ende sijnder Coninghinne crooninghe, ghelijck gheschiet es tot Praga. Anno.xxvij.
[VP den sondach den.xxiiij.sten dach der maent Februarij]
VP den sondach den.xxiiij.sten dach der maent Februarij. Anno.xxvij.so es Coninck Ferdinandus als Eertshertoghe van Oostenrijck, in root karmesijn fluweelen choor mantel, ende met een Eertshertoghen hoet met een gulden cruys, ende beyde mantel ende hoet waren gheuoeyert met ermijnen, des morghens te seuen hueren, met drie gheestelicke Vorsten, te weten den Bisschoppen van Olmunts, Preslau ende Trent, ende met twee weerlicke Vorsten, Casimirus ende Iorien broeders, Marcgraue van Brandenburch, oock noch.vi.ander Prelaten, veel Grauen, heeren ende edele met trompet stekers seer costelick in sinte Wentzels kercke te Praga vpt tslot inghegaen in eender schoonder processien, als hier na volcht.
¶ Inden eersten allen die Canoniken van Praga, daer na allen Abten ende Proosten ende daer nae die Bisschop. Veruolghende sijn ghedraghen gheweest die cleynoden ende offer van drien vander rudderschap. Die een was een vergult vaetken met wijn, ende die ander twee, twee vergulden brooden, ten offer, nae die ordonnancie Melchisedech. Op dyen seluen offere hadde heer Apel ghenaemt vander ghemeender rudderschap weghen het sweert ghedraghen. Ende heer Dislawff ghenaemt vander Leyp vpperste lantrechter den scepter, heer Adam van Nyeuwen huys Cancellier den maiesteyt appel. Dye croone es van heer Leben vpperste Burcgraue ghedraghen gheweest, ende twee heeren van Rosenberch hebben van beyden sijden neffens hem ghegaen, ende hebben die croone aenghegrepen ende helpen draghen.
¶ Op dese clenoden die alsoo nae malcander ghedraghen sijn, heeft dye Coninclijcke maiesteyt ghegaen, daer nae des paus ende des conincx van Inghelants ambassaten, des Paus ter rechter sijden, ende des Conincx van Inghelant ter slincker sijden. Op dese twee hebben ghegaen dye twee Marcgrauen ende die Ambassaten van Vngaren, op die seluen een seer lange processie van Grauen, heeren ende Rudderschap, welcke veel guldenen stucken ende sabulen voeder nae den besten droeghen, oock met grooten ketenen ende clenoden costelijck ghechiert.
¶ Als nv die Coninclijcke maiesteyt inder kercken voor den outaer quam, die tsamen metten gheheelen choor es behanghen gheweest met guldenen stucken ende met seer costelijcker tapitserien, heeft die coninclijcke maiesteyt neder gheknielt, soe hebben die heeren welcke die clenoden droughen oock die gheestelijcke ende gheheele heerscapie om die Coninclijcke maiesteyt ghestaen. Ende dye Bisschop van Olmunts die benedictie ghegheuen, die Coninclijcke maiesteyt es weder vp ghestaen, ende in eenen stoel dye ontrent vijf schreden van den outaer midden inden choor stont, ende met gulden stucken seer costelic ghechiert, gheleyt. Dye vier voorseyde heren hebben met den clenoden voor den stoel ghestaen ende hebben die seer heerlick voor die Coninclicke maiesteyt eenen langhen tijt ghehouden. Ende heer Lebe heeft in Beemscher spraecken dryewerf naer malcanderen luyde gheroepen voor allen staten, met desen woorden. Wildy desen Fenandum etc. tot eenen Coninck. Daer vp hebben allen menschen gheroepen. Iae wil willen hem hebben. Op sulcx hebben alle trompette blasers gheblasen met grooter vruechden. Doctor Ritius domproost van Trent, heeft vp eenen preecstoel die met gulden stucken omtoghen was ghestaen, in eenen swerten fluweelen rock, ende heeft een schoon Latijns sermoon ghedaen, vp den theem, Waer die sonne niet en schijnt daer es dat Eertrijck onvruchtbaer. Alsoo ooc, welck volck van God nyet voorsien en es met eenen coninc daer en wordt ter eeren gods, noch ter sielen salicheit niet gheregiert etc. Ende heeft desen Coninck seer hooch ghepresen, wel een gheheele huere lanck gheduerende.
Auteursrechtvrij