Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Als dan dye alder christelijcste coninck van Vngaren die saken verstont]

Als dan dye alder christelijcste coninck van Vngaren die saken verstont, welcke bootschap hem te horen vreemt was, so schicte sijn Coninclicke maiesteyt Boden ende Ambassaten huyt, die saken te vercondighen, dye den coninc ware kenschap brochten, hoe dat dye tyrannissche Turck met groter macht van volcke int landt was, ende alles verderfde dat daer was, waer af dye Coninck seer leede te moede was, want hi ter orloghen seer qualicghestelt was ende met allen qualic daer vp versien, want daer en was ghelt noch volc te peerde noch te voet. Also dede

[fol. xxix.v]

hi cortelinghe huyt scriuen in allen sijn lantschappen, Bemen, Polen, Merhern, ende Vngaren, om volc ende hulpe, ooc vp den keyserlijcken rijcksdach die ionst te Spier verclaren, hoe wel hem so corts ende gheringhe gheen hulp gelijc die noot eysschet mocht ghescien, ende nochtan dye tyrannissche hont nacht noch dach en rustede etc. Nochtans dede die vrome coninc (ghelijc eenen christelijcken coninc behoorde) sijn landt ende lieden toemakende, ende versuymde hem niet langhe, tooch huyt met ynnegher viericheyt ende grooter haesticheyt met weenich volcx in een vlec gheheeten Dulua.xvi.mijlen naer Ossen aen die riuier Donaw gheheeten gheleghen, al daer slouch hi sijnen eersten legher yeghen den Turck, ende en hadde bouen vier duysent mannen niet by hem te peerde ende te voeten, ende moeste hem lieden eeuen also wel besorghen in dat dorp voor die Vngaren als voor den Turc. Ende terstont begonst een allaerm onder hem lieden van twee forieren, des conincx forier ende des bisschops van Gaus Forier, die quamen tsamen voor een herberge. Doen woude des conincx Forier sijnen heere den Coninck daer in logieren. Ende des Bisschops Forier den bisschop van Gaus daer in forieren, ende sprac, sijn heer waer coninc in Vngaren. Daer om gafmen des bisschops Forier sijn recht, ende lieten met clippelen staen dat hi starf. Ende als die coninck om hulp huyt screef maecte hem dat volck ouer al vp om hem toe te trecken, ende den hoop begonst te meerderen. Doen dedemen den legher weder trecken tot Batha, drie mijlen van Dulua. Als si noch gheen hooftlieden en hadden, ende haer regement niet besedt, noch gheen ordonnancie, oock die Vngaren malcanderen verslouchen ende verworchden, naer weynich tijts maeckten si hooftlieden, ende wart vanden Vngaren vpperste hoofman ghemaect Thamere Paul die welcke een minderbruer gheweest hadde, ende corts te voren tot eenen bisschop tot Galischan ghemaect was. Dye ander graef Iorye van Treut des van Weyda broedere, beede gheboren Vngaren. Daer naer toghen si weder naer Mahaisch aender Danen, ende al daer was eenen machteghen hoop vergadert by.xxx.duysent sterc te peerde ende te voet, die bi hem hadden.v^c.goeder waghen ende hebben een stercke waghenburch ghesloten, ende haren legher gheslaghen in dye waghenburch, hoe wel si noch gheen goede ordonnancie noch regement en hadden, ooc tot die slach oorden noch nyet ghestelt en waren. so en was dat Turcsche Legher niet meer dan een halue mijle van daer gheleghen, ende haddent al rontsomme verbarnt Doen had die coninc tot hem laten commen sijn lantsheeren, sommeghe bisschoppen ende Prelaten, ende met hem lieden daer Raet ghehouden ende sijn met haren raet ouer een ghecommen, ende hebben ghesloten, als dat si yeghen den Turck slaen wouden ghelijc hier naer volcht.