Hoe die tyrannissche raserye der Turcken int Conincrijck van Vngaren, int voorleden ses en twintichste Iaer ghehandelt, ende veel onschuldichs christelicx bloets ghestort heeft.
Oock hoe die Christelicke coninck van Vngaren met veel Christelicke rudders Vorsten ende heeren, gheestelick ende waerlick haer leuen gheeynt hebben.
Nae dat die voorghenoemde turck cortelinge Rodis, Griecxwitsenburch met anderen vasticheden der Christenheyt afghedronghen, ende in heeft oock naer sijnen lust ghesterct ende beset etc. is hy wederom in sijne oude voetstappen ghetreden, ende heeft hem naer den heleghen Sinxdach inden somere des ses en twintichsten Iaers by Griecxwitsenburch ouer die water vloet die Saw, heymelijck ende onuersiens vp ghemaect met eenen seer machteghen groten toech te peerde ende te voet bi twee hondert duysent sterck, oock met een groot ontallick gheschut. Ende als dye voorseyde Turck alsoo in stiller haesticheyt onbehindert, met goeder tijt dat gheschutte met alle rustinghe ouer dat water vp der Christenen sijde, in dat Vnghersche lant bracht, welc wel te doen was, aenghesien dat si den slotel van Griecxwitsenburch hadden. Daer hebben si al haer volck te peerde ende ooc te voet ghemonstert, oock haer bussen ende waghenborch ernstelijck ghestelt, ende een ordonnancie ghemaeckt vp seuen mijlen breet, alsoo in dat landt herwaerts ende ghinswaerts gheuallen, ende daghelicx voorder ghetoghen, ende dat alsoo inghenomen ende al gheheel verbarnt ende verworcht daer sy aen quamen. Sonderlinge waermen teghen hem ter weere stelde, hebben si noch vrouwen noch maechden ionck noch oudt, noch nyemanden ghespaert, maer al ghedoot, ende hebben alsoo vier weken int landt gheleghen, eer dat die Coninc van Vngaren ghewareghe kentschap mochte hebben. Ende als si nerghens hem lange en versuymden, maer met haer grote macht van volcke dye si hadden altoos voort aen toghen tot dat si quamen in dat Sinicher landt, daer den besten Vngherschen wijn plach te wassen, ende daer dat landt met prouanden alder beste versien was daer schicten si hem eerst recht ter weere ende lagherden hem lieden, ende sloughen haer Cameelen (dier si een grote somme hadden) in die wijn berghen datse dye wijnstocken met den wijndruuen tot aen die eerde af aten, ende inden gront verdoruen, want si dye verraderye ende kenschap wel hadden dat gheen wederstoot voor handen en was, so mochten si haren moet ende wille wel ghebruycken nae huerlieder begheerte. Ende doen si dat vaste slot Peeter wardijn wonnen, sloughen dye valsche rasende tyrannen vijf hondert Christenen den hals af, ende een yeghelijck stack een hooft vp sijne spies, ende ghinghen alsoo met grooter triumphen. Ende als si vp die plaetse quamen voor den Tyrannisschen Keysere, dede eender een oratie ende sprake voor den voorseyden tyrannisschen Keysere, ende naer der seluer sprake hebben si die hoofden die vp huerlieder spiecen stonden al laten vallen etc.
Auteursrechtvrij