Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Hoe vrou Margareta Raedt hielt Tantwerpen met haren ghemeynen Landen, als Hollant, Zeelant Brabant.etc. Ende hoe si.iijc.duysent gulden begheerde, om daer met den Hertoghe van Gheldre te wederstane.

¶ Dat.xij.Capittel.

[fol. xvij.r]

IN desen seluen tijt wert den raet Tantwerpen ghehouden van den ghemeynen landen.te weten Hollandt, Zeelant, Brabant, Ende mijn vrauwe Margarete begheerde CCC.duysent gulden, om den Hertoge van Gheldre met alle sijnder macht te wederstane, dwelck di voorseyde landen niet doen en wilden, maer si wouden die ruyters selue houden ende ghesloten, dat wt elcke stadt eenen ghedeputeerden soude sijn, die dese penninghen bestellen soude tot den ruters betalinghe, in dwelcke dye van Bruessele niet consenteren en wilden, maer wilden selue volck wt seynden.

¶ Item in deser tijt trocken die Geldersche int landt van Valckenborch, daer si sommighe Dorpen af bernden.

¶ Item int laetste vanden Meye des selfs iaers, doen wasser een iaer lanck bestandt ghemaeckt, tusschen dese landen ende den Hertoghe van Gheldre.

¶ Item in die maent Iunius, doe trac me vrauwe Margriete van Antwerpen naer Bruessele, ende mijn heere van Crueninghe was doen rewaert ghemaect van Vrieslant ende track derwaerts met schoonen state, ende hulde die steden inden name vanden Keyser.

¶ Item Omtrent een maent, naer dat die Bosschenaers ende Hollanders wt beuele vanden houe thuys ghetrocken waren, so verbernde die stadt van Bommele in Ghelderlant al of, wtgesteken die prochiekercke.