Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Van dye oorloghe tusschen Ghelderlandt, Vrieslandt, ende Hollandt.

¶ Dat.viij.Capittel.

Mijn heere van Wassenare als ruwaert van Hollant duer tbeuel vanden Keyser, ende bede vanden Hollanders, trac met machte in Vrieslant, ende nam in die stercten, die de hertoghe van Geldre in hadde. Omtrent October beleyde hi die stadt van Sloten, daer hi vele scharmutsinghe tsegen hadde, ende wart duer sinen aerm gheschoten, maer int eynde so gaf haer die voorseyde stadt vp, ende brochte Vrieslant onder des Keysers subiectie. Ende met Groeninghe maecte hi een compact maer na sijn doot keerden si aen Gelderlant.

¶ Tusschen desen wart hy sieck, ende starf te Leeuwaerden, ende wart in Hollandt inden Haghe begrauen.

¶ Item doen hi voor Sloten lach, so quamen ontrent.viij^c.gheldersche knechten in Hollant ende brantschatten ende roofden tot Leyden voor die poorte, maer die dat deden wierden beclipt vp eenen dijck, ende meestendeel verslaghen van mijn heere van Wassenare.

[fol. xvi.v]

¶ Also gheringhe als die Gheldersche vernamen dat Wassenare doot was, quamen die Gheldersche in die Dortsche weert, ende verbernden daer vele schoone houuen ende dorpen, ende bleuen daer wel acht daghen lanck, so dat si des anderen daechs naer sinte Lucien dach die huysen af berenden, tot Gorkom voor die poorte.

¶ Item inden somer van desen iare, so waren tusschen Antwerpen ende ghele vp een heye vijf vleeschauwers gheuanghen vanden snaphanen wt Ghelderlant, ende voerdense in Ghelderlant vp haer roofhuysen, ende waren ten grooten rentsoene gheset.

¶ Doen die Gheldersche niet vp en hielden van Roouen noch van barnene vp Hollandt, doen wert openbaerlick oorloghe, ende dye Hollanders trocken in Ghelderlant, ende bernden daer vele Dorpen af.

¶ Item in die maent van Februarius.anno.xv^c.ende.xxiiij.doen warender een deel Mechelaers ende Hollanders knechten onder een, omtrent vier of vijf hondert die sonder capiteyn liepen vp die Veluwe, omme daer eenen roof te halene, maer daer teghen quam die Graue van Muers met.iij^c.peerden, ende vele lantsvolc, ende versloeghen daer meeste alle die knechten, so datter luttel ontquam.

¶ Item in die Maerte daer naer so quamen die van Tyel ende Bommel, ende bernden Os ende Tielborch byden Bossche af, ende doen quamen daer vele Bosschenaers wte met hondert peerden ende vele poorters, ende hebben een deel Gheldersche verslaghen, ende vele ten Bossche ghebracht. Doen hebben die vanden bossche ende die Hollanders vele knechten ghenomen ende hebben Bommele werde, ende voort alle die Dorpen van Tyel ende Nymmeghen tot aen die poorten toe af ghebernt, ende bleuen in Ghelderlandt, ende wierpen sloeten ende huysen ter neder.