Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Van dye oorloghe tusschen den Keyser, ende Coninc van Enghelandt, ende den Coninc van Vranckerijcke.

¶ Dat.vij.Capittel.

[fol. xv.v]

DOen den Oegst ghedaen was vergaderde die Graue Floris van Bueren diemen heet van Ysselsteyn, vele volcx te peerde ende te voet, ende daer quamen oock ouer die zee wt Enghelandt, meer dan.x.duysent Enghelschen, Dese trocken te samen met ganser macht van armeye ouer die Somme in Vranckerijcke, in dye maent van Octobri bi Corbye, ende deden daer grote schade, winnende veel cleyne stedekens, als Roey, Ancker, Brey, Mondidier, ende trocken voort tot vp een dachreyse naer Parijs, ende int weder keeren so beroofden si alle dese stedekens, ende quamen weder in Nouember, wantet seer begonste te vriesen. Corts daer nae quamen die Fransoysen, ende namen Auennes in, ende beroofden alle dat daer was, ende trocken daer mede in haer landt.

¶ In deser tijt waren die Fransoysen omtrent Mylanen seer sterck, ende deden daer grooten cost, maer profiteerden seer luttel

¶ Item tusschen Schotlandt ende Engelant, en ghebuerde nyet merckelijcx, dan daer was eenen dach beteekent vp sinte Crispijn ende Crispiniaens dach om te slane, mer die Schotten en quamen niet te velde.

¶ Item in dit iaer ghebuerden seer vele roouerien, te water ende ooc te lande, makende den armen landtman ende Zeeman ende coopman arme ende beroyt.

¶ Item in dit selue iaer so was dye gheestelijcheyt gheschat, duer consent vanden Abten, van die raeye te gheuen den.xx.sten penninc van een iaer renten, ofte daer omtrent, naer dat si aen ander renten belast waren.

¶ In dit selue iaer vp den Bruesselschen omme ganck so vielen te Bruessel, ende daer omtrent tsgehen den auont haghelsteenen also groot als hinnen eyeren, duyuen eyeren, ende ooc in veel meer ander plaetsen, die grote schade int cooren dede.

¶ In Septembre vp heylich cruysdach, so starf paeus Adrianus, die.vi.van dyere namen te Roomen, die vergeuen was so men seyde.

¶ Des nachts voor sinte Andries auont, so

[fol. xvi.r]

stonter sulck een gheweerte vp, als datter huysen omme waeyden, ende muelens, ende dede groote schade daert ghebuerde.

¶ Item int beghinsel van December, so quam hier warachtighe tijdinghe, dat een Florentijn Paeus ghecoren was, ende daer omme bedreuen die nacie van den Florentijnen te Brugghe ende Tantwerpen groote ghenouchte, met vyeren ende ander ghenouchten.

¶ Vp sinte Nycasius dach, so ghinckmen Tantwerpen processie metten heylighen sacramente, ende des auonts vierdemen eerlijc vp die merct, om dat ons Keyser ende die Paeus Lombardyen, Italien.etc.te samen gheaccordeert waren, ende dat die Fransoysen die bi Mylanen laghen, weder om thuys vertrocken waren.