MAer dat die Prinche Kaerle die Croone ontfanghen hadde, so track hy weder nae Cuelen, ende hy beschreef eenen rijcxdach tot Norenborch, maer wanttet daer so seer sterf so wert den rijcxdach gheleyt tot worms, daer vele heren bescreuen waren, ende doctor Luther was daer ooc bescreuen, om dat hi vphieft die leeringhe van Iohannes hus, dat verboden was in eenen consilium, waer bi een groote beruerte comen is ondere gheestelijcke ende weerlijcke personen. Niet teghenstaende van dien, hi compareerde vpten rijcxdach voor den Keyser, die hem vry gheleye ghegheuen hadde sonder sorghe te comen ende te gaen. Ende want die Prince die tijdinghe hadde, dattet in Spaengien seer qualijc stont ende datter groten twiste vp gheresen was tusschen die landen, heeren, ende dat ghemeyn volc, so stelde hi daer tot wille vanden kueruorsten Fernandum stadthouder voor hem want hi stelde vp weder in Spaengien te reysen, om den twist ende tweedracht der heeren ende landen neder te legghen.
¶ Binnen desen middelen tijden, so taste coninc Franciscus van Vrancrijc vp des Keysers landen, rouende ende bernende, dwelc dye Keyserlijcke maiesteyt geseyt was. Waer om hi gram wert ende seyde. Naer dat ic in gheenen vrede sijn en mach in gheenderley manieren, hoe wel dat ickt altijt begheere, so gheloue ic, dat ic hem so lange rot houden ende teghen hem ende sinen adherenten oorloghen sal begheren, ghelijc dat daer nae geschiede int iaer van xxv.vp sinte Mathijs dach. Ende ons volc wonnen sommighe castelen vp die frontieren voor Masieris, mer die capiteynen werden tweedrachtich inden legere, ende Franciscus van Sichenen dede so veel dat den leger vp brack ende elck track weder nae tsine.
¶ Vp die selue tijt quamen die Fransoysen ouer dye Zomme in Henegouwe ontrent Valencijne, daer die keyser doen binnen was des die stadt seer veruaert was, ende die Fransoysen namen daer een stedeken in, dat si spolieerden ende destrueerden, Ende die heeren vanden Keyser, als mijn here van Nassou, die graue van Bueren, here van Ysselsteyn, mijn here van Emmery hooch baeliu van Henegouwe met meer ander, trocken met haer ruyters int ghemoete, ende meendense aen die riuiere te verlaghen, ende het was seer doncker gheneuelt, dat ons volc niet verre van hem ghesien en conde, so dat si aen malcanderen quamen eer sijt wel wisten, daer si een schermutsinge hadden metten fransoysen. Maer den hoop der fransoysen was so groot, dat ons volc weder weeck in dye stadt van Valencijn. so dat die Fransoysen daer omtrent roofden, ende hebben die arme lantlieden gheuanghen, ende so trocken si weder ouer die Somme in haer landt sonder grooten wederstoot.
¶ In die maent van Nouember int selue iaer van.xvc.xxi. so beleyden die Bourgoensche omtrent.xiiij.daghen die stadt van Doornicke ende si en schoten mer eenen dach, ende gauen huer vp, vp sinte Andries dach, onder die handen vanden Graue van Vlaendren.
¶ In dese selue maent, so was Tantwerpen onse vrauwen kercke int ces, ter causen datter.ij.bouuen daer inne gheuochten hadden.
¶ Omtrent deser tijt, so wast cooren seer diere, want die tarwee galt.ij.croonen, ende den rogghe.xxxvi.stuyuers.
¶ Item omtrent desen tijt, so wonnen ooc die Spaengiaerts met des Paeus volck, die stadt van Mylanen, ende daer naer wierter dicwils gheuochten, maer die fransoysen hadden die nederlaghe.
¶ Item iaer ons heeren.xvc.xxij.int eerste vanden iaer, so quam die tijdinghe dat Leo de Paeus doot was, ende dat meester Adriaen van Vtrecht Paeus ghecoren was.
¶ Item inden April daer naer, doen wert bi Egmont eenen visch gheuanghen die groot was in sijn lengde.lxx.voeten, ende sijn grootte daer naer volgende. Daer werden afghehauwen meer dan.C.lx.tonnen visch, sonder het inghewant.
¶ Item in die maent van Meye, so reysde meester Adriaen van Vtrecht ghecoren paeus van den Keyser nae Roomen, daer hi seer eerlijcken ontfanghen was.
¶ In dit selue iaer.xvc.xxij.vpten Palmsondach, doen waren te Cuelen.ij.kinderen aen een gheboren hebbende.ij.hoofden.ij.armen, ende maecsel van een meysken, ende.iiij.beenen, ende waren ghedoopt.
Auteursrechtvrij
