Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Van coninc karels eerste reyse ouer Zee in Spaengien.

[fol. iij.r]

[Totten.xij.sten dach Augusti]

MAer dan Coninck Phelips in Spaengien ghestoruen was, so liet hi achter veel kinder, onder welcke Karel dye outste sonde was, die welcke dye naeste oor was van desen landen ende vanden Conincrijcke van Castilien, Lyon etc. Ende om dat hy noch nyet en was commen tot sijn mondeghe iaren, so ordonneerdemen sommeghe heeren die hem regeren souden, ende koren Keyser Maximiliaen voor eene momboor. Ende om dat die Keyser meest tijt absent was, so maect hi regent sijn dochter vrou Margrieten weduwe van Sauoyen, ende mijn heere van Chieure bewaerder vanden prinche, tot dat hy in sijn landen hier ghehult was ende die besworen hadde. Doen quam hem menighe tijdinge huyt Spaengien, hoe dat grooten twist was tusschen dye heren, ende dat die een bouen dander wilde domineren. Waer door hi ontboden ende ghebeden wert dat hi ouer commen wilde, ende ontfanghen sijn erflanden ende rijcken, ende neder legghen die tweedracht dye int lant was vp gheresen. Des die regeerders van desen lande ghinghen te rade, ende accoordeerden dat die prinche soude ouer trecken ende ontfanghen die croone der conincrijcken. Ende hier nae hebben si haer dinghen beschict, als aengaende van desen landen, ende die ghedeputeirde heeren vander ordenen ende knechten trocken metten Prinche naer Walcheren. Ende ontrent het eynde van Iunius int iaer van.xvij.es coninc Karel te Middelburch in Walcheren ghecommen, om met den eesten wint in Spaengien te seylen, ende es daer blijuen ligghen bi ghebreck van winde totten.xij.sten dach Augusti, soe creghen si goeden wint, ende quamen so cortelinck in Spaengien son-

[fol. iij.v]

der eene auontuere weerdich om scrijuen. Ende als si in Spaengien waren ghearriueert, so trocken si voort te lande van deen stadt tot die ander, daer die edele prinche tot allen steden ende plecken seer eerlijcken ontfanghen werdt, ende met grooter vruechden ende triumphen wert hi alomme willecome gheheeten. Ende die heeren van den steden ende landen dye tusschen weghen laghen verselschapten sijn edelheyt alle te samen, tot dat si metten edelen prinche quamen tot in die stadt van Valedoly, daer hi doen binnen quam met groten state, daer hi seer eerlicken in ghehaelt wert met groter triumphen vanden heeren vanden landen ende rijcken die hem daer verbeyden, die hier na in sijn croonemente eens deels bescreuen sijn. Ende binnen deser stadt van Valedoly is ghecommen don Fernande, hebbende dat gulden vlies oft Toyson dor om sijnen hals. Die Coninck hadde seer schoonen staet bi hem in die incomste van deser stadt. Daer was die Conestable van Castilien, die Hertoge Dalbe, die Marcgraue van Villane, die Graue van Boneuente, die hertoghe Darques, die hertoghe van Surquorbe, ende een groote menichte van bisschoppen ende ander prelaten ende heeren. Ende daer waren wel.vi.duysent peerden, so peerden so muylen, ende een groot ghetal van gouden tabbaerden, want die gouden stucken sijn daer seer ghemeyne. Kaerle die coninck was seer ghenoechlijc om sien, die seer costelic ghecleet was met eenen gulden stuck verchiert met veel costelijcke ghesteenten, ende hy hadde om sijn bonette een costelijcke boghe een iuweel bouen maten costelijck. Ende also rijckelijc verchiert sadt hi op een Spaens peert hem seer lustich verthoonende, so dat alle dye groote Princhen ende heeren met dat ghemeyn volck van hem seer verblijt waren. Ende in dye incomste vanden edelen Karel den Coninck reden voor hem veel edele mannen ende heeren, als hondert edel mans vanden huyse der kersten. Ende dye edelmannen vanden huyse des Conincx ende doe dye groote heeren ende meesteren vanden Conincrijcken. Ende doe quam die coninck ghereden onder een tabernakele. Ende die graue van Pese droech dat sweert. Ende recht voor den coninck reden die ambassaden van onsen heylighen vader den paeus, vanden Keyser, vanden Coninck van Inghelant. Ende recht achter die tabernakele so quam mijn vrouwe Leonora ende des conincx broeder Fernande ende dye aertsbisschop van Saragossen, na die vrouwen quam die Cancellier ende al die heeren van den rade van Castilien, ende noch veel meer andere.

¶ Int iaer van vijfthien hondert ende seuenthiene so wast eenen groten winter, men ghinc Tantwerpen ter borcht ouer die schelde, ende in Zeelant reetmen met waghenen ende peerden, ende quamen ouere in Brabant.

¶ In die maent van Februarius, so fondeerden die predikaers Tantwerpen het poortael van haerder nyeuwer kercke.

[Ontrent onser lieuer vrouwen dach Augusti]

¶ Item ontrent onser lieuer vrouwen dach Augusti, so quamen die Gheldersche ende die Vriesen in Hollant, ende wonnen Alckemaer met cracht ende Asperen, ende stakent al die kele af ionck ende out, ende si verbarnden vele dorpen.

¶ In dit selue iaer so regneerde dye sieckte van pleuresis seere, so datter menich mensch af starf, ende ooc die siecte van quenancie.

¶ Int laetste van desen iare wast dicwil onghetempert weder, so dat groote stormen dicwijls onuersiens op stonden, soe datter drie oft vier vanden meesten schepen van Antwerpen verdroncken.

¶ Item dye broeder van onsen coninc Kaerle quam wt Spaengien met veel schepen, ende arriueerde in Walcheren, ende track doe eerst nae tlandt van Vlaendren in die stadt van Ghent, daer hi eerlijcken ontfanghen wert, als vanden ghenen die den here beminnen Dit ghesciede ontrent sint Ians misse, int iaer.M.CCCCC.xviij.