¶orts na desen Coronemente, ende dat die voorseyde Eertshertoghe voortane den tijtel ghedraghen heeft van conincschape.
Ende na die doot vander voorseyde vrauwe Ysebeau coninghinne van Castilien etc. so heeft die voorseyde Phelips coninck van Castilien een eynde willen maken, omme te conquesterene dlant van Ghelre al ende eer hi nae sijn conincrijcken van Spaengien heeft willen reysen, ende ontrent der maent van Aprille es hi ghetoghen met grote heyrcrachte ende instrumenten van artelrye voor dye stadt van Boemel, ende heeft daer vore doen slaen twee blochuysen, so datter nyemant wt noch inne en mochte, ende van daer ghetoghen naer die stadt van Arnhem, die welcke haer vp ghegheuen heeft in handen vanden voorseyde coninck. Ende corts daer nae gauen hem ouere als vore Harderwijck, Hattem, Elburch, Doesburg, Grol, Thielt Bommel, Lochem, met vele ander plaetsen Ende quamen ooc onder den coninc sommeghe vanden princepaelsten edelen van den lande van Ghelre, so dat die voorseyde coninck lichtelick alle tgheheel lant van Ghelre ghecreghen soude hebben ghehadt. Ooc werdt als doen vp tslot van Hattem gheuanghen Ian die Bastaert van Ghelre met des grauen sone van Suffock diemen hiet die witte roose, die bi Kaerle van Egmont daer in vanghenisse wert ghehouden. Ende es die voorseyde bastaert van Ghelre ghestelt in bewaernissen int slot van Rijssele.
Auteursrechtvrij