Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Hoe die Eertshertoghe Phelips warachteghe tijginghe ontfinc]

Hoe die Eertshertoghe Phelips warachteghe tijginghe ontfinc, hoe dat die alder doorluchtichste vrauwe die Coninghinne van Spaengien etc. aflijuich gheworden was. Ende hoe hi corts daer nae te Bruessele, Coninck van Spaengien ghecroont werdt etc.

ITem inden iare vijfthien hondert ende sesse, quam warachteghe tijdinghe wt Spaengien hoe dat dye alder vroomste ende duerluchtichste vrauwe die coninghinne van Spaengien etc. aflijuich gheworden was, welcke vrauwe ende Coninghinne seer grootelijck ghepresen behoort te wordene ende gheuoecht byden vernaemsten ende vermaertsten vrauwen, daermen in

[fol. CC.xcvi.r]

ouden hystorien af scrijft, als Camilla, Zenobita, Pentasilea ende Thomiris sijn gheweest, want sy seer vele schoone faeyten van wapenen voor Granaten bedreuen heeft, ende sijn mits der aflijuicheyt van haer bi rechter orien ende successien den conincrijcke van Castilien ende Granaten, ghedeuolueert vp vrau Iohanne haer dochtere die Eertshertoghinne, midts dat Fernande haer broeder ende haer oudtste suster coninghinne van Poortegale waren ghestoruen sonder gheboerte achter te latene, soe dat die Eertshertoge Phelips van sijnder ghesellinnen weghen es ghesuccedeert in die voorseyde Conincrijcken, ende ghecroont coninc van Castilien, Leons ende Granaten, ende es tselue met solemniteyten ende ceremonien daer toe dienende naer behoorlicker ghewoonten te Bruessele in Brabant ghedaen.