Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Item als dye voorseyde steden van Ghelrelandt ghecommen waren in handen vander Coninclijcker maiesteyt van Castilien etc.

So eest ghebuert datmen seere ghelaboreert heeft, so by den Bisschop van Wtrecht so ander Vorsten, dat men eenen paeys ende tractaet maken soude tusschen der voorseyde Coninclijcker maiesteyt ende den Hertoghe van Ghelre, soe dat by goeden onderwijse die voorseyde coninck gheinduceert es gheweest omme te verstane tot eenen accoorde, dwelck dye Ghelderschen seer versochten, ende sochten alle manieren dat dye voorseyde Coninck Phelips hem soude willen nemen in ghenade, ende es so verre daer inne gheprocedeert, dat die voorseyde Karel van Egmont es ghecompareert in presencie vander coninclijcker maiesteyt, ende heeft hem die selue Kaerle groote reuerencie ghedaen, ende vp sijn knyen gheuallen. Maer die coninclijcke maiesteyt heeft hem weder vp gheheuen, ende heeft hem ghelijc hy was een minlijck prinche ende paeyselick Prinche in ghenaden ghenomen, ende hebben tsamen langhe ende breet ghesproken, ende gheloofde dye voorseyde Kaerle te commene by den Coninck te Bruessele, dwelck hy dede. Ende was ghesloten dat hi vp des conincx coste mede reysen soude naer Spaengien, ende hadde selue ghelooft, midts den appointemente met hem ghemaeckt, maer en heuet tselue nyet ghehouden noch volbracht, ghelijck tselue openbaer es. Want hoe wel hi tselue vp grote penninghen gheloeft hadde en heues niet ghehouden, maer weder reysende naer Ghelderlandt omme hem reeden te makene es, hy al daer ghebleuen.