[Item tes te wetene dat in dit voorseyde schietspel hadden den vpper prijs van schoonts incommen]
Item tes te wetene dat in dit voorseyde schietspel hadden den vpper prijs van schoonts incommen, als huyten lande van Vlaendren die van Brugghe, te weten te lande. Ende die van Meenen haddene van incommene te watere, wantter nyement huyt Vlaendren en quammer te water inne dan si.
¶ Ende die van Bruessele hadde den prijs van schoonst incommen over tlant van Brabant. Ende es te weten dat die.iij.princepale prijsen die te winnen waren met schieten waren ghewonnen van.iij.steden, alle ghenoemt Berghen, te weten den hoghen prijs Berghen in Henegauwe. Den.ij.sten dye van sinte Winnocxberghen. Den derden die van Berghen vp den Zoom in Brabant.
¶ Item dye van Brugghe wonnen den wijn met schietene, maer anders niet. Maer sy hadden den prijs van costelicxste te teerene, ende dat was een schoon silueren canne. Ende dye van Nyeupoort voerden met hem lieden die silueren staken wt den doelen ende tlaken, metsgaders dat si tlaetste lot hadden Ende dus was tschietspel vuleynt met blijscap. Anno.xiiijc.xcix.
¶ Item dient voor ghenoteert hoe dye van Maestricht wesende in voorseyde schietspel, veel eerbaerheden tooghende ende oock vele genouchten. Ende sonderlinge so rechten si eenen mast in een schip liggende in dye schelde, ende vp dien mast was ghetemmert een casteel ende si daden een gebot doen, so die dat casteel beclemmen ende ghewinnen conste hy soude daer mede winnen.C.gouden guldenen, huyten welcken datter vele fraeye ghesellen van schippers ende andere naer clommen, maer also saen als si die hant vast hadden aen tcasteel om dat te beclemmene, so wort dat casteel so seere draeyende, dat si mits dien gheworpen worden in die schelde, ende swommen huyte ten besten dat si consten. so dat tvoorseyde casteel van nyemant ghewonnen en was, meer dan van haerlieder sot die si mede brochten om haerlieder ghenouchte.
Auteursrechtvrij