Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item int iaer.xvc.ende een so begonste die prinche hertoghe Phelips ende dye Princersse]

Item int iaer.xvc.ende een so begonste die prinche hertoghe Phelips ende dye Princersse, ontrent der maent van Ougst grote ghereeschepe te makene omme te reysene naer Spaengien, ende waren vergadert in die maent van Octobre in Henegauwe met vele edele mannen, ende alle seer rijckelic ghemonteert om die reyse van Spaengien aen te nemene metten prinche ende princhersse voorseyde. Ende es te wetene dat die.Coninc. van Vranckerijcke hadde ghesonden Ostaegiers, te wetene.v.edele heeren onder al den Dolphijn van Vranckerijcke verbeydende vander croone binnen der stede van Valenchijne, ende daer te blijuene tot dat die voorseyde hertoghe Phelips sijn reyse ghedaen soude hebben, metsgaders dat hi begeerde te reysene ouer landt duer Vranckerijcke, ende omme sijn reyse te vorderene, ende te tooghene dat hi sijn vrient was, so heeft die Coninc van Vranckerijcke ghedaen ghebieden al Vranckerijcke duere, datmen den voorseyde hertoghe tracteren soude ende eere ende weerdichheyt bieden alleens of hi daer selue in properen persoone ware. Ende was die voorseyde hertoghe al soe reysende naer sinte Quintens in Vermandoys. Ende al daer commende so hadde die coninc van Vranckerijcke yeghens hem ghesonden sijn grote gaerde, ende waren meer dan.xijc. peerden alle meest ghebardeert, twelc seer rijckelic was om sien Dese haddy ghesonden omme den hertoghe ende die hertoghinne te conuoyerene ende te gheleydene duer Vranckerijcke ende de bewarene van schade oft hinderen. Ende al daer so quam om den voorseyde hertoghe Phelips te willecommene die edele princhersse ma Damme de Beeuiu, ende ma Damme de Vendomme, met.xij.vergulden wagens seer rijckelic verchiert. Ende met desen edelen gheselschape was reysende van sinte Quintens nae die stede van Aens ende naer Compiengnen naer Senlijs, ende also commende tot sinte De

[fol. CC.xcij.r]

nijs vp twee mijlkens naer Parijs. Ende al daer eenen dach vertoeuende ter bede van die van Parijs, omme die triumphe ende chiere te vermeersene, diemen tsijnder blijder incomste tooghen wilde. Ende die eere die hem des anderdaechs ghedaen was binnen Parijs ne ware niet wel om scrijuen, wantter so menich lantshere ende edel man yeghen hem quam, ende ooc vele grote gheleerde mannen ende doctueren. Ende dus commende met al desen edelen state binnen, so waren die straten behanghen ende met schoonen lichte verchiert, ende reet also duer die stede tot int hof vanden graue van Vlaendren, ende was rustende binnen der seluer stede.v.oft.vi.dagen, ende es te wetene dat die voorseyde prinche dagelijcx ghinc sitten ten parlemente ende streec sentencie ende vonnesse van questien die lange int parlement ghehangen hadden, ende dede ooc iusticie ouer somme mesdadeghe persoonen, als oft hi selue coninc geweest hadde, twelc noeyt daer te voren ghesien en was.

¶ Ende aldus daer een wijle tijts gherust hebbende, so vertrac die hertoghe Phelips met so groten edelen gheselschape naer den coninc van Vranckerijcke voorseyde, ende was daer ooc eerlic ontfanghen. Ende die coninc van Vranckerijcke selue in persoone, met al die edele vanden lande quamen yeghen den voorseyde prinche, ende was al daer een wijle met groter ghenouchte, ende van daer scheedende, reysde naer tconincrijcke van Spaengien so esser menich edel man ende grote personagie, ende ooc van edelen vrauwen ende ioncfrauwen, daer den voorseyde prinche Hertoge Phelips ende die Princhersse sulck chiere ende blijden ontfanc ghedaen, dat dat niet wel om scrijuen en ware, al int lange. Ende also daer binnen den lande sijnde reysende vander eender stede ter ander, dat hem grote eere ende weerdicheyt ghedaen was. Ende also daer sijnde een iaer oft meer, soe es te wetene dat dye princhersse daer ghelach van eenen knapelicken kinde, daer of dat al dat lant seer verblijt was. Ende daer gheweest hebbende een termijn als voorseyde es, so es die voorseyde hertoge Phelips vertrocken huyt Spaengien naer Bourgoengien sonder in Vranckerijcke te commene ende die hertoginne bleef noch in Spaengien Ende hi commende in Bourgoengien was daer blijdelic alomme ontfaen, ende reysde also duer Bourgoengien na die duytsche landen bi sijnen vader den Roomschen.coninc.daer hi een wijl tijts bi was. Ende van sinen vader scheedende, so es ghecommen in sijne landen van herwaerts ouer, int iaer.xv^c.ende.iij ontrent midwinter Ende commende in Vlaendren was met bliscap ontfangen. Ende wesende te Brugge int iaer xv^c.ende.iiij.so es hi inden Meye getrocken na Blanckeberge, want die vlote hier voor tlant was, daer mede dat me vrauwe die hertoghinne mede quam huyt spaengien, ende was daer met hueren state aen lant ghepaelt, commende also te Brugghe, ende daer een wijle tijts gheweest hebbende, trac hi nae Ghent.

¶ Item es te wetene, als ons voorseyde princersse Iohanna wt Spaengien quam, soe liet si daer huer ioncxsten sone Fernande, om een versterckinge vanden lande van Spaengien etc.

[Vp.s.Mathijs dach twelc was den.xxv.sten van Sporcle en Int iaer.xv^c.ende een]

¶ Maer es te wetene dat hier te voren int iaer.xiiij^c.ende xcix.so gelach die voorseyde vrau Iohanna van hueren eersten sone, binnen der stede van ghendt, ende was vp.s.Mathijs dach twelc was den.xxv.sten van Sporcle, metsgaders dattet als doe scrickel iaer was, ende was ghenaemt Kaerle, vanden welcken grote blijscap bedreuen was binnen ghent, ende ooc al Vlaendren duere, als wel blijckelijc was ende ooc in alle die landen van herwaerts ouer