so wi alder naest connen ende moghen dat bi ons daer van ghetermineert sal moghen werden sal moeten hebben sijn vol affect, sonder daer vp te nemene eeneghe contradictie van appeele oft reformacie in eenegher manieren.
¶ Item voort so wat gheselschap dye eerlicste ende chierlicste sijnen prijs halen sal die hy met schieten ghewonnen hebben sal, ende tsauonts voor haer vertrec eerbaerlijcxt sijn taneel houden sal, die salmen gheuen een rijckelicke silueren canne, weghende twee marck.
¶ Item die daer naer int sghelijcx den seluen sijn prijs die hie met schieten ghewonnen sal hebben so voorseyde staet, ende ooc het sauonts voor haer vertrec eerbaerlicxt sijn Taneel houden sal, dyen salmen gheuen eenen rijckelijcken croes, wegende een marc siluers.
C Item so wie best den sot maken sal, commende met eeneghen gheselschapen van schutters, van ghenouchten sonder schimp oft vylonie, dyen salmen gheuen een iuweel van viere onsen siluers.
¶ Die daer naer den sot best maken als bouen, sal hebben een iuweel weghende drie onsen siluers.
¶ Item dye daer naer best den sot maken sal als bouen, dye sal hebben een silueren iuweel weghende twee onsen.
¶ Wel verstaende in dien so ghebuerde dat twee gheselschapen oft meer, stonden vp een prijs in sulcker wijs datmen niet iugeren en conste, soe taduijs tontstane met een prijs sonder meer. Ende alle die voorseyde iuweelen sijn in vlaemscher marcken.vi.onsen voor elck marck oft beter, ende sullen sijn verwapent met sint Ioris ende der stede wapene van Ghent, ende in gheen vanden voornoemde iuweelen en sijn gout noch fautsoen gherekent.
¶ Ende es te wetene datmen die voornoemde iuweelen die te winnen sijn met schietene met tschoonst staet te houdene, schoonst vieren ende met esbatementene, gheuen sal bi aduijse ende rade vanden seuen steden oft den meesten deel van dien die alle dye feeste ghesien sullen hebben elcke diese ghewonnen sullen hebben naer tinhouden deser onsen brieuen.
¶ Item so es meeninge ende wille dat nyemant en sal schieten met eeneghen boghe daer den loop vander tallure achter oft voren ghesplet sal wesen, oft met eenegher subtijlheyt besteken oft ghemaect sal sijn. Ende met sulcken boghe ende vijlen als elc begint te schietene om prijs, so sal hy vol schieten of hi en worde vp die stede ontreect van boghe oft van vijle, maer vp dat sijn sloot liete ende die vijle verloren ende ghebroken worden, so soude hi moeten doen sijnen eedt vp dat mens begheerde, dat sijns ondancx ware ende gheen arghelist daer inne en sochte. Ende dan sal hi hem moghen gaen stellen in proefstaecken ende nemen een ander vijle, ende proeuens in voornoemde proefstaken een schoot sonder meer, ende dan commen sijn schoten vol schieten.
¶ Ende in dien eenich schutter ontreect worde van boghe, doende als voren, sal moghen stellen.ij.staecken ende schieten ouer ende weder, dats te verstane twee schoten sonder meer, ende dan commen sijn schuete volschieten.
¶ Behouden dat elck schutter ghehouden wert te stane met beede den voeten vry binnen den latten die voor elcken doel ghesleghen sal sijn.
¶ Item dat elc sijnen boghe doen spannen sal moghen diet belieuen sal.
¶ Ende gheuielt so dat eeneghe vijle binnen den doele gheschoten ware, weder mense saghe oft niet, die mate salmen nemen aen den naesten cant daer dye vijle inghinc, te wetene vande gate sonder eenich wit af te schindene.
¶ Item gheuielt so dat daer yemant schote yeghen dye meet staken, in sulcker manieren dat die vijle weder huyt viele ende spronghe huyt den doele, dye schuere sal gherekent sijn mater sonder mate. Ende es ons ordonnancie datmen in dit voornoemde Schietspel niet schieten en sal met eeneghen stalen boghen omme die voorseyde prijsen.
Auteursrechtvrij