Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Hoe die Hertoghe van Sauoyen, een Ambassade seynde aen den hertoge Phelips, om te hebbende die voorseyde weduwe vrau Margriete te huwelicke.

[fol. CC.lxxxv.v]

ITem corts naer desen tijt soe quammer een eerlick ambassade byden hertoghe Phelips, huyter name vanden seer edelen ende machteghen hertoghe van Sauoyen, die welcke begeerde dye voorseyde weduwe vrau Margriete te huwelijcke, welcke huwelick gheconsenteirt was ende ghesloten by den Princhen ende edelen vanden lande, ende was dye voorseyde Margriete bi rade ende aduijse van vele groote heren ende princhen, die ten sluytene vanden seluen huwelicke waren, corts daer naer met schoonen state ende costelicheyt ghesonden naer dat Hertoochdom van Sauoyen, ende was gheconuoyeert vanden Hertoghe Phelips haren lieuen broedere, ende met meneghen seer edelen man.

[Vp den Paesschen dach]

¶ Item int iaer ons heeren duyst vier hondert ende.xxviij.so ghebuerde te Ghendt vp den Paesschen dach ter vesper tijt, datmen den Fierter vanden heleghen vrient gods sinte anthonis van Belle, ghedreghen hadde Tsinte Baefs in shelichs Kerst kercke. Ende daer sijnde so ghinck tvolc met groter druyst ouer die brugghe, soe men gaet naer Sinte Baefs ende die brugghe was versuymt te sluytene, midts dat een brugghe es diemen vp ende neder laet, om die schepen met seylen duer te lijdene, ende die voorseyde brugghe dye ghinc deen eynde vp ende tander eynde nedere, metsgaders tghewichte vanden seer groten volcke, so datter bi dien ghewichte ende swaerheyt viel in die schelde vele volcx ende oock verdranck. Ende onder al so wasser een vrauwe die welcke swaer ghinc met kinde, die welcke gheuischt wort, ende ghelach daer naer, corts sonder mesquame oft dangier dwelck een seer schoon ende groot myrakel was, Gode hebbe lof etc.