[Den.xxviij.sten dach van Maerte]
ITem den.xxviij.sten dach van Maerte naer paesschen. Anno.xcvij.doe beswoer Hertoghe Phelips, graue van Vlaendren die stede van Brugge, eerst hoorende messe tsinte Donaes, daer beswoer hy dye heleghe kercke naer costume. Ende naer die messe quam hi bouen vp tschepen huys, daer hi bouen in die veynster ghinc ligghen, daer een schoon gouden laken ghespannen was, ende beswoer al daer die stede van Brugghe vp thelege cruyce huerlieder rechten ende preuileigien ende goede costumen te houdene ende te onderhoudene gelijc als die sijne voorders ghegeuen ende onderhouden hadden, den welcken eedt hem staefde meester Ian rogiers Pensionaris vander stede van Brugge. Ende beneden inden burch stont een parc ghemaect daer hoofmannen ende Dekenen in waren, huyter name vanden ghemeenen volcke vander stede, ende meester Ian Rogiers die staefde den volcke dat beneden was den eedt, ende swoeren hem ghetrauwe ende onderdanege subdijten te sijne, ende sijn palen vanden landen te helpen beschermene naer haerlieder macht. Ende vp den seluen dach so beswoer hi oock tlant vanden Vryen. Ende corts daer naer vertrac hy naer Ipre, ende die Princersse bleef te Brugge, ende men maecte grote ghereeschepe te Brugge omme een steicspel te houden. Ende corts daer naer so quam die prinche te Brugge, ende hadde besworen Ipre, Rijssele ende Oudenaerde, daer hi al omme blijdelic ontfanghen was.
¶ Item voort es te weten, vrau Margriet in Spaengien sijnde, ende ghetraut hebbende den.Coninc.van Spaengien so wiert si beurucht, ende hadde eenen iongen sone bi haren man, dye welcke ionc starf. Ende corts daer naer so ouerleet die voorseyde prinche van Spaengien, des conincx sone, ende vrau Margrite wedewe wesende, corts daer naer soe keerde sy weder huyt Spaengien herwaerts ouer naer haers broeders landen, ende arriueerde in Zeelant, ende van daer trac si te Bruessele in Brabant, bi haren broedere den hertoge Phelips graue van Vlaendren.
Auteursrechtvrij
