Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.xviij.sten dach in Maerte. Anno.xcvi.]

Item vp den.xviij.sten dach in Maerte. Anno.xcvi.so quam Hertoghe Phelips te Brugghe, met sijnder coninghinne inder manieren alsoo hi te Ghendt in quam, ende dye poorte daer hy in quam was seere verchiert. Ende hem waren ghetoocht vele schoone spelen van stommen personagien vander poorte totten houe, byden neghen leden vander stede van Brugghe vp diueersche manieren ghemaeckt, waer of tverstant van alle voorseyde spelen te lanc ware om scriuen. Ende die nacien vanden cooplieden hadden diueersche huysen tusschen der muelenbrugghe ende den houe, die seer rijckelic verchiert waren met behanghe ende met lichte van toortsen, ende sonderlinge die Venechianen al behanghen met gulden lakenen, ende die Spaengiaerden met lakene root ende blaeu, ende alle dandere rijckelijcken verchiert met diueerschen wapenen van schilderyen. Ende dye Spaengiaerden lieten huyt loopen twee pijpen wijns, die elck drincken mochte diet gheliefde, ende meer ander nacien deden van ghelijcken, ende eeneghe warender die stroyden cruyt ende tregye.

¶ Item die poorterye ende alle dye ambochten stonden lancx der straten alle in ordonnancien lancx den baelgien diere toeghemaeckt waren alle met toortsen, ende elck ambacht ende neeringhe met hueren wapenen aen die voorseyde toortsen, ende alle die huysen vander poorte totten houe waren chierlick behanghen met lakene ende met diueersche tapijtserye ende met lichte Ende die Baliu, die Schout, die wet, ende alle die notabele vander stede reden yegens den prinche, ende presenteerden hem buyten der poorten dye slotelen vander stede, ende sommeghe vanden drie boghen reden oock yeghens hem met seer schoonen state Ende vp dye marckt was een groot vier ghemaect dat barnde tot byden daghe. Ende beede dye hallen waren behanghen met lakene, root, wit ende blaeu, ende met diueerschen lichte van toortsen vp die voorseyde hallen. Ende tbeelfroot was verchiert met rooden lakene bouen ende oock met toortsen, ende alle die clocken vander stede van Brugghe beyaerden van dat die Prinche Hertoghe Phelips ter poorten quam tot dat hi was binnen sijnen houe. In deser manieren waren die Prinche ende dye Princersse seer minlic ontfanghen in huere stede van Brugghe. Ende hem lieden waren seer schoone ghiften gheschoncken van die van Brugghe tot haerder blijder incomste.

¶ Ende die ballinghen quamen met hem inne, maer sy quamen wat voren metter roode Roede diese beweichde. Ende die prinche hertoghe Phelips hielt sijn natael van paesschen te Brugghe. Anno domini.M.CCCC.ende.xcvij.