Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Hoe dye edele Hertoghe Phelips, met sijnder coninghinne quam binnen der stede van Ghendt]

Hoe dye edele Hertoghe Phelips, met sijnder coninghinne quam binnen der stede van Ghendt, seer rijckelijc verchiert, metten Toysoene aen sijnen hals, daer hi seer eerlicken ontfanghen wert vander wet, met der gheheelder ghemeynte vander stede.

[Den.x.sten dach in Maerte]

ITem den.x.sten dach in Maerte, so quam die edele hertoghe Phelips, met sijnder coninginne binnen der stede van Ghent, dye welcke binnen.xi.of.xij.iaren binnen Vlaendren nyet gheweist en hadde, maer hadde hem altijt ghehouden in Brabant, ende hy quam seer rijckelick inne metten Toysoene aen sijnen hals. Ende me vrauwe die Princhersse was ghecleet met gulden lakene, ende sadt in eenen osbare seer rijckelic verchiert, ende al hare ioncfrauwen quamen achter al vp muylen met costelijcke sadelen ende ghetuyghe, ende alle groote breede hoeden vp thooft, ende waren alle seer rijckelic ende wtnemende costelick ghecleet nae die Spaensche maniere. Ende voor hem lieden reden soe mijn

[fol. CC.lxxxiiij.v]

heere van Beuere, mijn heere van Rauesteyn, ende meer ander heeren vander oordene. Ende voor die voorseyde heeren reden xij.paeygien, al gheheelijc gecleet met root lakene met gouden stringhen gheborduert ende met gheschakierde hoeden, ende quammer inne tsauents ontrent den.ix.hueren. Ende die vander wet met notable vander stede reden yeghens den prinche, ende daer waren ghetoocht vele schoone spelen vander poorte totten houe toe, ende vele notabele vanden schutteryen reden oock yeghens hem, ende die huysen waren al chierlic behanghen, ende met menichte van schonen lichte van toortsen was hi beweicht tot binnen sijnen houe toe. Ende alsdus was hi daer seer eerlicken ontfanghen, maer die ballinghen van Ghendt en quamen nyet inne voor tsanderdaechs. Ende die voorseyde hertoghe Phelips confirmeirde die van Ghent den eedt die huyt sijnder neme te voren ghedaen was. Ende dye voorseyde stede verghifte hem seer eerlicke, ende dit staet dus int corte etc.