Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item in desen seluen tijt waren gheordonneirt vander stede weghe dye welcke in alle sermoenen omme gaen souden voor die aerme huysweecken]

Item in desen seluen tijt waren gheordonneirt vander stede weghe dye welcke in alle sermoenen omme gaen souden voor die aerme huysweecken, ende voor sommeghe verweeckte poorters, ende dat souden si distribueren alle die stede duere daert hem lieden nootsakelijc dochte. Ende dese voorseyde personen souden sijn ghecleet root ende swart, ende ontrent den hals eenen silueren rinck metten heleghen gheest.

[Den.xxvij.in Nouembre]

¶ Item den.xxvij.in Nouembre starf dye Baliu van Brugghe mer Kaerle van Huytkercke, ende was begrauen ten Augustijnen, daermen drouch met den lijcke.xx.iiij.toortsen, alle dye lieden gheslooft gaende int swarte, elck metter wapene voor sijne borst, ende aen die toortsen, ende met.iiij.stal lichten. Ende vp tlijc lach sijne wapene metten tymmere van schilderyen seer chierlic ende was begrauen in die cappelle byden hooghen outaer bi sijnen voorders.

¶ Item vp den seluen tijt was te Brugge gheordonneert datmen elc sestendeel maer eens tsiaers panden en soude, ende datmen niet meer dan.viij.poortersche dinghedaghen houden en souden, ende datmen alle questien huyten soude.

[Item.xv.in Decembre]

¶ Item.xv.in Decembre doe swoer mijn heere Adriaen van claerhout here van Pitthem, Baliu van Brugghe, dye welcke als doe was Burghmeester van schepenen, ende was gheslaect van sijnen eede, ende mer Ian van Nyeuwenhoue, worde als doen Burchmeester in sijn stede, te wetene mer Ian van Nyeuwenhoue.F.claeys.

¶ Item in dit elue iaer wast eenen couden wintere, van reyn ende van grooten storme van winden ende van watere, so datter vp die zee vele schepen verdoruen, ende daer gheschiede seer grote schade in Vlaendren in diueersche plaetsen.