Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item die Hertoge Phelips een lettel tijts in Zeelandt gheweest hebbende]

Item die Hertoge Phelips een lettel tijts in Zeelandt gheweest hebbende, ende sijn suster Margriete den Amyrael van Spaengien ouergheleuert hebbende met schoonen state als princersse van Spaengien ende bruyt van des conincx sone voorseyde, met vele vrauwen ende ioncfrauwen, so nam hy oorlof aen sijn sustere ende aen al haer gheselschap, daer was groot mesbaer van weenen ende van screyen als si van malcander schieden. Ende midts dat den wint langhe tijt contrarie bleef liet hi sijn suster daer met haren gheselschape princhersse, ende track met haer van daer naer Bruessele. Ende daer waren baelgien ghemaect om te stekene ende te triumpherene ter eeren vander nyeuwer Princhersse ende van harer blijden incomste, ende si waren daer seer eerlic ontfanghen. etc.

[Item.xxvi.in Nouembre]

¶ Item.xxvi.in Nouembre was te Brugghe verboden metter clocke, dat gheene aerme persoon van nu voort aen en gheorloue te gane in gheene kercken, noch ooc in eeneghe Cloosters om aelmoessene lancx der kercke, maer souden moeten sitten buyten der kerck dueren in ordonnancien, omme aldaer daelmoessen van eenen yeghelijcken te ontfanghene, diemen hem lieden souden gheuen.