Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hoe den Lantprijs Tantwerpen ghehouden was, van Rethoroijcken.

ITem vp desen seluen tijt was ghehouden Tantwerpen dye grote ende schoone triumphe ende den Lantprijs van Rethorijcke, daer of den vpper prijs vanden spele van sinne, waren.iij.sieluren cannen, welcken vpper prijs wonnen die ongheleerde van Liere. Ende die Materie dier huyt ghegheuen was, was dese metsgaders ander voor redenen daer si toe seyden.

Deducerende daer mede dalder oorboorlicste, ende meest misterye ofte gracie dye god tot des menschens oorboor ende salicheyt gheordonneirt ende verleent heeft.

¶ In welcke triumphe van Rethorijcke versaemt waren.xxviij.cameren ofte tijtelen van Rethorijcken, te wetene huyt Brabant, huyt Vlaendren, ende huyt Hollant, ende Zeelant. Te wetene van Ghendt drie cameren, eerst die fonteyne vander stede van Ghendt, die Barbaristen, ende dye van der boomloose mande. Voort die van Oudenaerde, dye van Aelst, dye van Denremonde, die van Hulst, die vander Sluys die van Oostende, die van Ipre, ende dye van Seuencote bi Ghistele, maer die van brugge en quamer nyet. Somme vanden ghenen die huyt Vlaendren quamen.xi.cameren.

¶ Ende vanden.xxviij.cameren so quamen dye xxij.in ende deden huere intreye te lande al vp eenen dach, ende dandere.vi.quamen inne te watere vp den.ij.sten dach daer naer. Te wetene die fonteyne van Ghendt, die van Berghen vp den Zoom, dye van Amsterdam in Hollant, die van Remerswale huyt Zeelant die vander Sluys, ende die van Oostende.

[fol. CC.lxxxij.v]

¶ Item in welcke intreyen beede te watere ende te lande grote ende onbegripelicken cost ende triumphe ghedaen was, so dattet met lettel redenen niet scrijuelick en ware, want ick Andries die smet die dit screef, als ghenouchte hebbende in die Retorijcke, track van Brugghe daer omme Tantwerpen ende sacht al diesser of ghebuerde.

¶ Item int selue Iaer starf mer Cornelis metteneye, die welcke daer te voren Schoutheeten gheweist hadde, ende was begrauen ten Augustijnen.

¶ Item vp den.vi.sten van Wedemaent drouchmen te Brugge een deuote processie generael, in die welcke men drouch tweerdich helich Sacrament, ende men drouchse huyter Burch den grooten ommeganc, ende also weder tsinte Donaes, omme den almoghende God te biddene om ghetijdich wedere.