Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Item vp Sinte Baselis dach quamen die scotters vanden ouden boghe van eenen schietspele dat gheweest hadde te Denremonde

Item vp Sinte Baselis dach quamen die scotters vanden ouden boghe van eenen schietspele dat gheweest hadde te Denremonde, daer sy beschoten hadden ende met hem lieden brochten den tweesten prijs te wetene.vij.silueren schalen, ende waren triumphelicken in ghehaelt vanden capiteyn, Baliu ende Schouteeten, ende vele andere notabele. Ende triumpheerden tsauents vp die poorters loodgie, daer vele ghenouchten was van esbatementen ende anders, ende der stede speellieden waren daer ooc spelende diueersche montetten, ende vp Sint Ians brugghe was een schoon vier ghemaect.

¶ In die selue maent van Wedemaent maectet sulck een ongheweerte van dondere ende van blixeme, so dat een Ian van houte wesende vp sijn goet te Ronche in sijn eetcamere, daer den dondere ende blixeme quam door tcafcoen, waer of dat dye voorseyde Ian daer doot ghesleghen was, ende corts daer naer ghebrocht ghekist vp eenen waghene in sint Ians huys, daer vrienden ende maghen tlijck verbeyden, ende was tsauents ontrent den.x.hueren begrauen in onser vrauwen kercke, in die capelle van Ian van Nyeuwenhoue doude.

¶ Int eerste van Septembre was dye wet van Brugge vermaect, als costume es, ende was doe Burchmeester van Scepenen mer Ian van Claerhout heere van Pitthem, die int iaer te voren Burchmeestere vanden Courpse gheweest hadde, ende met hem bleuen aen.v.schepenen vander ouder wet, welcke ordonnancie daer te voren noeyt ghesien en was. Ende doe was ghemaect Burchmeester vanden courpse Iacob despaers Tresoriers, Adriaen van drabbe, ende Iacob die Donckere.

[Vp den derden dach van Septembre]

¶ Item vp den derden dach van Septembre was of gheroupen die kelioote vander poellage, ende van hoye ende van stroo, maer alle dander keliooten bleuen noch gaende.

[Vp den.vij.sten dach van Septembre]

¶ Vp den.vij.sten dach van Septembre was te Brugghe of ghestelt dye assyse vanden corte wijnen nae doude costume, sonder die heete wijnen, ende dat elckerlijc vry varen ende keeren mochte, ende coopmanscap doen in allen landen van onsen prinche den hertoghe Phelips.vi.maenden lanc gheduerende.

[Vp onser vrauwen dach in Septembre]

¶ Vp onser vrauwen dach in Septembre was te Brugghe een deuote processye generael ghedreghen tonser vrauwen, omme te biddene dat vrau Iehanne Sconincx van Spaengien dochtere, bruyt vanden hertoge Phelips, die welcke met vele schone schepen lach voor Calis, ter sluys int zwijn met blijschepen soude moghen arriueren, maer het gheuiel dat si arriueerde in Zeelant wel met.C.ende.lxxx.schepen, den.ix.sten dach in Septembre, ende bleef daer een stick tijts gheduerende.