Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.xxx.sten] dach van April. Anno.xcvi.]

Item vp den.xxx.sten dach van April. Anno.xcvi.was ten Carmers ghehouden tgrote capittel generael, daer vele schone disputacien ghehouden waren binnen der voorseyde conuente onder hem lieden, twelck elckerlic hooren mochte. Ende si droughen seer schone processien, te wetene, tsinte Donaes, tonser vrauwen, tsinte Saluators, ende also voort, ende ghinghen vp den heleghen bloetdach alle mede in die processie vanden heleghen bloede, ende waren tsamen met die van binnen ontrent.ij^c.ende.lxxx.broeders. Ende hem lieden waren ghetoocht diueersche schoone figuren in haerlieder processie, dienende ter materie van haerlieder oordene, ende dat ghedaen sijnde trac elc weder in tsijne.

¶ Item vp den.xxv.sten dach van Meye quamen die voorseyde ghedeputeirde van Brugghe, wederhuyt Oostlant, maer si en brochten niet sulcke antwoorde, dat die voornoemde Tauerniers haerlieder wijnen wilden vercoopen anders dan vp haerlieder oude costumen ende preuilegien.