Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Hoe hertoghe Phelips vertrac huyt Henegauwe, naer duytschlant, tot sinen vader den Roomschen coninck.

[fol. CC.lxxxij.r]

ITem.xxv.in April.Anno.xcvi.so vertrac Hertoghe Phelips huyt Henegauwe met sijnen state van veel diueersche heren ende edele mannen, seer rijckelick verchiert, naer dye duytsche landen tot sijnen vadere den Roomschen coninc, dye welcke varre van hem was, maer sijn meeninghe was altijt om hem te volghene.

¶ Item corts daer naer trocken ghedeputeirde van Brugghe, te wetene eenen meester Gouaert doctuer in Theologie, Anthuenis voet, ende een Pensionaris vander stede van Brugge in Oostlant, omme met hem lieden te communikierene vander duytscher hanse, ende aengaende den rijnschen wijnen, metsgaders dat si van haerlieder preuileigie niet scheeden en wilden.