Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item.xxix.in meye Anno.xcv.]

Item.xxix.in meye Anno.xcv.so was ghehouden tgroote Capittel generael vanden Fremenueren, twelc binnen.xl.Iaren daer te voren te Brugge niet gheweist en hadde. Ende die processie ghinghen huyten cloostere vanden Freren gaende tot den Iacoppijnen, daer si eerlicken ontfanghen waren, want daer inden reiftere die tafelen ghedect waren ende ghestoffeirt met spijse, daer si mochten inbijten die dat gheliefde. Ende van daer ghinghen si ten Carmers, daer si ooc eerlic ontfanghen waren, ende van daer ten Augustijnen van ghelijcken. Ende van daer ghinghen si te sinte Claren, daermen een solempnele hoochmesse dede, ende daer was hem lieden een eerlick inbijt gheschoncken, naer betaemte. Ende van daer quamen si ouer die Vlaminck brugge duer dye Vlaminck strate, daer voor den soppere van die ghesellen vanden.iij. Sanctinnen ghetoocht was een schoone figure van sinte Fransoys in stomme personagien, ende ghingen also rontomme die marct voor by Cranenburch, ende also duer dye breydel strate rontomme die burch duer sinte Donaes kercke, ende quamen weder duer dye breydel strate, duer dye wulle strate, ouer die groote eechout brugghe, ende van daer weder binnen den cloostere vanden Fremenueren. Ende waren tsamen met dye van binnen ende metten kinderen wel.iiijc.personen oft meer, welcke processie was eerlijc gheordonneirt ende schoone om sien, waer of tvoorseyde cloostere groten cost hadde, want sy mostense alle den cost gheuen ten minsten vijf maeltijden. Ende noch waren tot sommeghen plaetsen daer si leden seer schoone personagien ghetoocht ende ander behanghinghe, ter verchieringhe vander voornoemder processye. Ende alle dye ghene die haer aelmoessen deden den voorseyde cloostere verdienden groote gracien ende pardoenen, ghegheuen vanden paeus huyter name vanden capittele voorseyde.

[fol. CC.lxxxi.r]

[Vp den.xxiiij.sten dach van Wedemaent]

¶ Item vp den.xxiiij.sten dach van Wedemaent ende was den sondach van Triniteyt. Anno xcv.so maectet groot ongeweirt van donder ende blixem ontrent den.v.hueren smorgens, so dat den torre van thuys van mijn heere van.s.Ioris in die oude burch wiert door dongeweirte alle die scaelgien of ghetrocken, die ghespannen ghebroken binnen, ende ooc.ij.trappen ontween ghetrocken, ende.ij.steenen pylaren vanden seluen torre gheschet, maer het reynde so seere metten seluen ongheweder datter tvier qualic yewers aen geuesten mochte, gode lof

¶ Item in dien tijt so was een man van Poperinghe een Drapier sittende vp sint Ians brugge, te Brugghe vp ghenomen ende gheuoert tot in Zeelant, niet wetende hoe hi daer gherochte. Ende tot hem seluen commende quam weder te Brugge ende trac naer huys, maer hi bleef daer naer altijt licht van sinnen.

¶ Item den.xxvij.sten dach van Wedemaent, soe was te brugghe in.s.Donaes kerc een gebot gedaen, dat alle officiers souden verlaten sijn binnen.xiiij.dagen eerst commende ende datmen alle dofficien verpachten soude ten profijt vanden hertoghe Phelips Ende vp den.x.sten van hoytmaent waren verpacht diueersche officien, by dye ghecommitterde vanden prinche, byden welcken worde doe Schouteeten van Brugghe in dye stede van mer Cornelis metteneye eenen Phelips Pinnoc. Ende Ghelein van Banck wiert Baliu van Male, ende Ian baue Baliu vanden Zietseelschen, ende meer ander officien wierden verpacht in diueerschen plaetsen.

[Item.xiij.in Hoymaent]

¶ Item.xiij.in Hoymaent. Anno.xcv.waren dye laetste.iij.beilden voor Tschepen huys staende al vulmaect. Ende vp sint Iacob ende s.Christoffels auent was teerste gebot ghedaen byden nyeuwen Scouteeten phelips pinnoc.

[Den.ij.sten van Septembre]

¶ Den.ij.sten van Septembre was die Wet te Brugge vermaect. Ende waren doe Burchmeesters, Ian die hont grossier, ende Ian van Claerhout heere van Piettem.

¶ Vp den.xi.sten van septembre.Anno.xcv.so vercochten die tappers vander duytscher hanse waren weder haerlieder rijnsche wijnen nae doude costume, te weten Ipre den gouden leeu, lonnen, ende meer andere ende staken weder haer bannieren huyt, te.vi.groten. den stoop.