Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[fol. CC.lxxx.v]

Hier begint die Coronijcke vanden edelen Prinche Hertoghe Phelips, sone van den Roomschen coninc Maximiliaen, ende die.xxxiij.ste Erfachtich Graue van Vlaendren, geboren te Brugghe.

¶ Dat.lxix.Capittel.

[Vp den vierden dach van Lauwe Anno.xciiij en den.xxviij.sten in Maerte]

ITem vp den vierden dach van Lauwe Anno.xciiij.soe was te Brugge een ghebodt ghedaen huyter name vanden Hertoge Phelips, out sijnde ontrent.xvij.iaer, graue van Vlaendren, wantmen in sulcker manieren noch noeyt gheen ghebot ghedaen en hadde sichtent sijnder gheboorte.

¶ Item den.xxviij.sten in Maerte so was te Brugghe een ghebodt ghedaen in vorme van mandemente, hoe dat die rijnsche wijnen souden gheuen van nv voort aen van assijse van elcken stoop.ij.groten. Ende van alle corte wijnen eenen groten. meer dan si plochten te gheuene. Ende dat ghebodt ghedaen sijnde, so trocken alle die taueernen vanden hansen haerlieder bannieren inne, ende en wilden niet meer gheenen wijn vercoopen, aenghesien dat haerlieder preuilegien daer mede ghecorrumpeert souden sijn, ende sonden terstont die tijdinghe aen dye steden vander duytscher hansen, ende also bleeft een wijle tijts staende.