Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Hoe die Roomsche Coninck ende sijne Coninghinne]

Hoe die Roomsche Coninck ende sijne Coninghinne, ende dye Hertoghe Phelips, ende Margriete sijn sustere, hielden haerlieder Natael van midwintere, binnen der stede van Mechelen, daer si grote triumphe ende ghenouchte bedreuen met grooter costelicheyt.

[fol. CC.lxxx.r]

ITem vp dien tijt so hielden dye Roomsche coninc ende sijne Coninghinne, ende die hertoghe Phelips, ende Margriete sijne sustere haerlieder Natael van midwintere te Mechelen, ende si bleuen daer met haren state langhen tijt, omme dat die landen niet wel en consten accoorderen vp tstic van tlandt van Vlaendren te besweerene vp dien tijt.

[Vp den.xxvij.sten in decembre Anno xciiij.vp sinte Steuens dach]

¶ Item vp den.xxvij.sten in decembre Anno xciiij.vp sinte Steuens dach doe beswoeren tlant van Vlaendren dese naervolgende persoonen, te wetene te Ghendt.

Die Marcgraue van Baden

Mijn heere van Nassauwe

Meester Ian Saluaedge

Die Graue van Sooren

Boudewijn de Lille

Meester Pauwels de Baenst.

Ende trocken buyten Ghendt te Zwijnhaerde, ende beswoeren daer tlant van Vlaendren te houden in rechten, ende in iusticien ende te beschermene voor die vianden, ende alle preuileigien ende oude costumen te onderhoudene van sijne voorsaten. Ende van daer trocken si tsinte Peeters te Ghendt, ende beswoeren daer die helege kercke van ghelijcken, ende van daer trocken si int Schepen huys, ende beswoeren daer dye stede van Ghendt te houdene in rechten ende in iusticien, huyter name vanden hertoghe Phelips, ende waren daer eerlic ontfanghen. Ende dit ghedaen sijnde dese voorseyde heren trocken weder byden prinche te Mechelen, ende droughen hem den eedt ouere dye sy huyt sijnder name ghedaen hadde.

¶ Hier eyndt genouch dese Coronijcke, want den hertoghe Phelips corts hier naer volchen sal, in sijne possessie ende eerlicheden als sijne voorders ende ouders ghecostumeert sijn van doene.