Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[In dye maent van Hoymaent quam die Coninghinne van den Coninck Maximiliaen te Mechelen]

[Den.ij.sten dach van Septembre Anno.xciiij en up den.viij.sten dach van Nouembre den.x.sten in Nouembre vp sinte Maertens auent]

In dye maent van Hoymaent quam die Coninghinne van den Coninck Maximiliaen te Mechelen, daer sy vanden Hertoghe Phelips ende Margriete sijn sustere, ende die heren vanden Rade ende vander Wet vander stede seer eelick ontfanghen was, ende men bedreeffer seer grote ghenouchte al dye stede duere.

¶ Item den.ij.sten dach van Septembre Anno.xciiij.was die wet van Brugge vermaect, ende waren Burchmeesters, Ian die deckere, mer Ian van Praet.

¶ Vp den.viij.sten dach van Nouembre was te Brugge of gheroupen die kelioote, die een seker tijt ghegaen hadde op thoet tarwe.xxx.groten, ende was ghestelt vp.xx.ende die rugghe.x.groten, ende ander graen in aduenance.

¶ Den.x.sten in Nouembre vp sinte Maertens auent so wast een groot tempeest van winde ende watere, ende tsauents tusschen viij.ende.ix.hueren wast groot tempeest van donder ende van blixeme te lande ende ter zee, ende daer verdroncken vele visschers.