Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item den.viij.sten dach in April naer paesschen Anno.xciiij.]

Item den.viij.sten dach in April naer paesschen Anno.xciiij.so was te Brugghe een ghebodt ghedaen bi Ottroy vanden prinche ende byden ghemeenen volcke vander stede, datmen vp den seluen dach verhooghen soude die kelioote vanden corene, gheordonneert byden.xl.mannen dye daer toe ghenomen waren, te wetene.iij.iaer lanc gheduerende. Ende daer waren toe gheordonneert viere personen die daer die handelinghe of hebben souden omme daer mede te betalene dachterstellen ende schult vander stede van Brugge, ende om dat elck poortere soude moghen vry gaen ende keeren in allen steden sonder ghemolesteirt te sijne ter cause van eenege renten oft schulden vander voorseyde stede. Ende dit waren die vier personen, Ian de boot, Anthuenis voet Iacob die donckere, Fransoys parmentier.

¶ Item dye kelioote was ghestelt vp elck

hoet tarwe.	xxx.groten.
Een hoet mesteliuun	xxiiij.groten.
Een hoet rugghe.	xx.groten.

[Totten laetsten dach van Ougst]

End al het andere graen in aduenance. Ende die brussche keyte galt eenen groten de stoop Ende doude kelioote van alle maniere van vittaelgie die soude blijuen gaende totten laetsten dach van Ougst.

¶ Item vp den Meydach Anno.xciiij.soe was te Brugghe een steicspel ghehouden vp doosterlinghen plaetse, in platten sadelen van oorloghen, waer of dat beroupers waren, mijn heere vander Mote ende die bastaert metteneye. Ende eyghens hem lieden quam een edel man wter name vanden Hertoghe Phelips, ende noch eenen man vander Sluys dit steicspel gheduerde.v.daghen lanc met, ende grooter triumphe.