Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item.xiiij.in Nouembre so quam mijn heere vanden Gruythuyse al sieck binnen der stede van Brugghe]

Item.xiiij.in Nouembre so quam mijn heere vanden Gruythuyse al sieck binnen der stede van Brugghe, ende wiert soe lancx so sieckere, soe dat hy corts daer naer starf. Ende vp den.xxvij.sten van Nouembre. Anno.xcij.soe was hy begrauen tsauents ontrent den neghen hueren in onser vrauwen kercke, in sijn tombe seer simpelicken, vier Canonicken droughen hem, ende daer en waren maer.xij.personen verslooft, elck met een barnende toortse in dye hant, sonder wapenen aen tlijck, ende daer ghinghen seer lettel personen inden Rauwe. Ende twas vp dye huere als hi begrauen was seer horribel weder van grooten winde, datter vp onser vrauwen kerchof boomen huyter eerde woeyen, god ghedincke sijn siele ende alle sielen Amen.