Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.xx.sten in Octobre so quam mijn heere van Rauesteyn binnen der stede van Brugghe]

Item vp den.xx.sten in Octobre so quam mijn heere van Rauesteyn binnen der stede van Brugghe, daer hi seer minlick ende blijdelijck ontfanghen was, ende ghinck logieren int hof van Rauesteyn, ende die Capiteyn Tientevyle dye moeste gaen logieren int huys van Willem Moreel. Ende tsanderdaechs daer nae was een groote maeltijt van triumphe ghehouden vp Tschepen huys, daer dye Hertoghe van Zassen, ende mijn here van Rauesteyn beede waren ter maeltijt, ende veel meer groote heeren. Ende daer was hem lieden seer blijde chiere ghedaen van der wet van Brugghe, die hem lieden seer bedancten vander grooter gracie die si der stede ghedaen hadden ende den gheheelen lande van Vlaendren, ende daer was hem lieden ghebeden dat si tlant voort in paeyse ende in iusticien wilden houden.