Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item den.xij.sten in Octobre. Anno.xcij.]

Item den.xij.sten in Octobre. Anno.xcij.so quam sauents die tijdinghe te Brugghe dat den paeys certeyn ghesloten was, tusschen mijn here Phelips van Rauesteyn ende den hertoghe van Zassen vp en dyen dat mijn heere Phelips tcleen casteel soude ouer gheuen binnen.xiiij.dagen eerst commende, ende ooc die stede vander sluys dies soude hi blijuen binnen den groten casteele totter tijt dat hi alle sijn penninghen soude hebben diemen hem tachter ende schuldich was. Om welcke tijdinghe ende blijschepe men in alle kercken luyde ende beyaerde diueersche poosen, ende men hilt ende bedreef alle dien nacht grote ghenouchte binnen der stede van Brugge, gode van hemelrijcke bedanckende van sijnder gracie die hi ons verleent hadde, wanttet wel eene schadelicke orloge gheweist hadde voor die stede van Brugge ende ooc voor tgeheele lant Anno.M.iiij^c.xcij.

In octobre den.xij.sten dach voorwaer
Wast paeys ter sluys int openbaer.