¶opye vanden paeyse, vander stede vander Sluys int corte.
AElbrecht byder Gods ghenaden hertoge van Zassen Lantsgraue in Duninghen, Marcgraue van Messene, regent van Vlaendren, ende stedehoudere vanden Roomschen Coninck, ende van onsen lieuen ende beminden neue Hertoghe Phelips sijnen sone, in desen hueren landen van herwaerts ouere, doen condt eenen yeghelicken yegenwoordich ende toecommende, also die wel gheboren onsen lieuen neue mijn heer Phelips van Rauesteyn etc. sekere tijt van iaren die stede vander Sluys ende beede die casteelen in sijnen handen ghehouden heeft, daer inne ende huyt den seluen sloten ende stede ghedaen ende ghedaen doen den ghewillege landen ende ondersaten ons gheduchts heeren ende neue voorseyde, diueersche affeeren van orloghen, daer duere ende omme dese saken te remedierene ende den voorseyde heere van Rauesteyn die stede ende beede dye Casteelen vander Sluys te bringene ter ghehoorsaemheyt ons inden handen als stedehouder voorseyde Ende bi expressen beuele vander Coninclijcker maiesteyt van nooden es gheweest die voorseyde stede ende sloten in heyrcracht te belegghene, ende naer dat wy die voorseyde here van Rauesteyn dye stede ende beede die casteelen sekeren tijt beleyt hebben ghehadt, so heeft die voorseyde here van Rauesteyn aen ons ghedaen versoucken, omme met ons te moghen communikierene, omme te paeyserene ende te wederlegghene alle die defencien ende gheschillen wesende tusschen den coninc Maximiliaen ende onsen voorseyde neue den Eertshertoghe aen deen sijde, ende hem ende sijne adherenten aen dander sijde. In welcke communicatie so vele ghedaen es bi tusschen sprekene vanden wel gheboren, ende bysondere onsen lieuen neue mijn heere Inghelbeert van Nassauwen, heere van Breeda, Stedehouder van Vlaendren, Kaerle die prinche van Symay, Phelips van Bourgoengien heere van Beuere, dat sulc een tractiet ghemaect es tusschen ons inden name als Stedehouder voorseyde ter eender sijde, ende den voorseyde here van Rauesteyn aen dander sijde. Eerst dat die voorseyde here eedt doen sal inden handen van onsen ghenadeghen heere als stedehouder generael, den coninck Maximiliaen ende mijn heere den Eertshertoge, goet ende ghetrouwe te sijne ende te blijuene, ende al te doene dat een goet ende ghetrauwe Vassael ende ondersate schuldich es ende behoort te doene. Voort aengaende den ban ghedaen Tantwerpen by den roomschen coninc, dat soude slaen in discretie vanden heeren vander oordene ende den hertoghe van Zassen, ende den erfachteghen heere den hertoghe Phelips, die daer of tlast ende kennesse hebben sullen Voort waert bi also dat die hertoge Phelips niet en quame tot sijnen.xviij.iaren so soude die voorseyde here van Rauesteyn naer die voorseyde tijt ghehouden sijn tslot ouer te gheuene ende te beuelene inden handen vanden erfachteghen heere. Ende tallen tijden als den coninc Maximiliaen ende den Eertshertoghe sijnen sone, in persoone bi rechte ghelieuen te commen in tvoorseyde slot met alsulcker macht alst hem ghelieuen sal sonder eeneghe condicie, ende sal terstont eedt doen vp dye verbuerenesse van sijnen lijue ende van alle sijne goedinghen. Ende voort belettende binnen desen middelen tijden datmen gheene schade doen en sal huyter stede noch vanden voorseyde casteelen yeghen den coninc Maximiliaen, te water noch te lande, noch ooc yeghen den Coninc van Inghelant, ofte sijnen ondersaten. Voort sal dye voorseyde heere van Rauesteyn terstont tcleen casteel ende die stede vander Sluys stellen in onsen handen, als inden handen van den Roomschen coninc Maximiliaen ende sijnen sone, ende leueren inden handen vanden hertoghe van Zassen als Stedehoudere generael, sonder eenich middele of delay daer inne te souckene. Voort dat die voorseyde heere van Rauesteyn hebben sal alsulc pensioen als hi gheploghen heeft, te wetene.vi.duysent gulden tsiaers, ende terstont.vim.gulden ghereet. Ende voor also langhe alst den coninc ghelieuen sal. Voort sullen hem volghen die renten ende goedinghen vander hertoghinne van rechts weghe, ende ooc sloten ende steden hem toebehoorende in allen landen, so waer dat die gheleghen sijn.
Auteursrechtvrij