[Item vp den seluen tijt so quammer een vroom capiteyn vanden hertoghe van Zassen met sijnen volcke ligghen ontrent Lapschuere]
Item vp den seluen tijt so quammer een vroom capiteyn vanden hertoghe van Zassen met sijnen volcke ligghen ontrent Lapschuere, ende aldus so was dye stede vander Sluys ront omme beleyt. Ende vp den seluen tijt so moesten huyter steden vanden Damme ruymen twee hondert ghesellen ende trocken voor die stede vander Sluys byden voorseyde capiteyn, ende deden daghelicx vele schermutsingen voor der sluys sonder cesseren.
¶ Item vp den.ij.sten dach van Septembre was die wet te Brugghe vermaect ende waren als doe Commissaresen
Mijn heere van Nassauwen
Mijn heere van Symay
Meester pauwels de Baenst
Die capiteyn van Brugghe Tietevyle
¶ Ende waren doe Burchmeesters
Iacob de heere.F.Anthuenis
Rogier vander Eecke.
¶ Item vp den.v.sten dach van Septembre, so quamen die vanden Damme noch voor die poorte van Brugge, te weten voor dezelpoorte, tot binnen der barriere ende schermutsten teghen die saudeniers vander stede, ende waren ontrent si.xij.of.xiiij.vanden Damme so varre datter.v.of.vi.van hem lieden ghequetst waren, maer si staken doot eenen waker vander voorseyde ezelpoorte eer si schieden.
¶ Item vp den seluen tijt so quamen die vanden Damme noch voor sinte Kathelijne poorte, ende namen daer ontrent wel.xx.peerden ende veel coeyen, so varre dat si daer ontrent der poorte veil schade deden ende schermutsten yeghen die saudeniers van sinte Kathelijne poorte, so varre datter twee of.iij.vanden wakers vander poorte so ghequetst waren tot vp die doot. Ende si vinghen een vanden saudeniers binnen der barriere.
¶ Item den.xi.sten in Septembre trac den Bisschop van Sarepten suffragaen van Doornicke, van Brugge te Ghendt waert om daer oordene te gheuene. Ende onder weghe sijnde vp een velt quamen daer sommeghe sluysenaers ende beroofden den Bisschop van alle sijne ringhen ende ander iuweelen, maer si lieten hem rijden te ghendt waert.
Auteursrechtvrij