Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Voort dit ghedaen sijnde dye coninclike maiesteyt ende mijn gheduchte heere sijnen sone den hertoghe Phelips]

Voort dit ghedaen sijnde dye coninclike maiesteyt ende mijn gheduchte heere sijnen sone den hertoghe Phelips, si sullen die voorseyde van Ghent consenteren alle huere vryheden ende preuilegien hier voortijts hem lieden ghegheuen metsgaders alle hare rechten costumen ende vsaegien die si behouden sullen, huyte ghesteken eeneghe pointen ende articulen in desen paeys begrepen, ende vp condicien ende reformacien also die inhouden, aengaende der heerlichede vander stede ende vanden Prinche, dye welcke te lanc waren om te scrijuen. Voort dat dye witte capproenen gheaboligiert ende of ghestelt sullen sijn, maer die van Ghendt om den here ende wet assistencie te doene, sullen.x.of.xij.ghesellen moghen houden.

¶ Item vp den.xi.sten dach van Ougst so hadden die Inghelschen die laghen sint Annen ter Mude scarmutsinge yegens die vander

[fol. CC.lxxvi.v]

Sluys ende ooc vanden cleenen casteele, waer of datter eeneghe vanden Inghelschen doot ghesleghen waren, ende vele warer ghequetst vanden gheschotte dat quam huyter stede, so dat si weder in haer parck moesten keeren.