Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[¶ Item in dye selue maent so vielen ontrent Cortrijcke wonderlicke grote haghelsteenen]

¶ Item in dye selue maent so vielen ontrent Cortrijcke wonderlicke grote haghelsteenen die grote schade deden in die vruchten die vp tlandt stonden, want si waren som also groot als hokernoten.ende maeckte groot tempeest van donderen ende van blixeme.

¶ Item den.xv.sten dach in Hoymaent so quam den hertoge van Zassen in casant met al sijnen gheselschepe. Ende daer quamen by hem sekere ghedeputeirde van ghendt om haerlieder stick hem het te apointierene, maer het en ghinc als doe niet voort.

¶ Item den.xxij.sten in Hoymaent so was den groten Raet vander stede van Brugge vergaert, ende daer was te kennen ghegheuen hoe dat die Hertoghe van Zassen begheerde van Brugghe Ipre ende tvrye.lxxx.duysent guldenen omme te betalene tgaernisoen dat lach binnen den lande van Vlaendren, dies soude hi dat doen ruymen ende vertrecken. Waer vp si antwoorden dat si gheerne in al wilden tbeste doen, in dyen men tgarnisoen wilde doen lichten.