Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den seluen dach so quam die hertoghe van Zassen wel met hondert schepen oft meer ter sluys int swijn]

Item vp den seluen dach so quam die hertoghe van Zassen wel met hondert schepen oft meer ter sluys int swijn, ende met vele volcx van wapenen, te wetene viere grote schepen met meersen, ende dandere waren meest huen, ende men maecte groote ghereeschepe om die stede vander Sluys te bestormene. Ende vp den seluen dach was te Brugge een ghebodt ghedaen dat alle die wercken consten metter spade ende ooc temmerlieden dat si commen souden sint Annen ter mude, men soudse te wercke stellen ende wel betalen.

¶ Item vp den eersten dach van Hoymaent soe quamen dye Ambassaduers weder te Ghendt van Mechelen daer si geweist hadden byden hertoghe Phelips, ende brochten met hem lieden haer appointement, twelc den heren van Ghendt te kennen ghegheuen was ende ooc alle het ghemeente vander stede

¶ Item vp den seluen tijt vinghen die vanden garnisoene vanden Damme eeneghe van den rijcsten poorters vander stede die burchmeesters gheweist hadden ende meer andere goede mannen, ter cause dat si nyet betaelt en waren van huerlider saudye, maer si waren cortelinghe ontsleghen midts dat si hem lieden paeyden.

¶ Item den.viij.sten in Hoymaent so quamen ter Sluys in tswijn.xij.schepen huyt Inghelant wel voorsien van wapenen van artchiers ter assistencie vanden hertoghe van Zassen. Ende schoten den eersten nacht dat si commen waren seere vreeselicken vp die casteelen ende ooc vp die stede vander Sluys voorseyt.