Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.xvi.sten dach van Wedemaent so was grote rommelinghe binnen der stede van Ghendt]

[Item vp den.xvi.sten] dach van Wedemaent so was grote rommelinghe binnen der stede van Ghendt, so varre dat haerlieder nyeuwe Capiteyn ghenaemt Aernout de clerc, gheseyt die ploughenare, dye welcke gheordonneirt hadde metsgaders Coppenolle ende sijn broeder om met hem wt te treckene met vier duyst mannen wel voorsien. Ende hi buyten commende en vant hem nyet sterc bouen vier hondert mannen, om twelcke hi hem seer vergramde ende keerde weder binnen der stede, ende comende voor der stadthuys, daer sloughen si den ouden capiteyn Remeeus doot ende quetsten seer Coppenolle, so varre dat si hem vinghen ende Gillis vanden broucke sijn broedere, ende vinghen eeneghe vander wet ende meer andere, ende des anderdaechs tsachternoens so was Coppenolle onthooft, ende sijn broedere, ter cause dat si meenden die stede ouer te gheuene inden handen vanden Hertoghe van Zassen.

¶ Item vp den.xxviij.sten dach van Wedemaent.Anno.xcij.so was te Brugghe onthooft eenen man geboren huyt Zeelant diemen met eenen byname hiet Zeeuken, die welcke metten voorseyde ontfanghere van sint Truwen quam huyt Zeelant. Ende als hy sauents in die stede quam twas late, ende hi leede den voorseyde ontfanghere tsijnen huyse daer hy woonde, ende was inde oostmersch om daer dien nacht te logierene, ende dese voorseyde woonde daer alleen ende hy en hadde gheen wijf. Ende desen ontfanghere huyt een goet betrauwen met hem gaende, ende sittende aen sijn tafele wel wetende dat den voorseyde ontfanghere vele ghelts ouer hem hadde, so heift hi hem om sijns ghelts wille die kele of ghesteken ende also deerlicken vermoort, ende heiftene in een spindekin in sijn huys ghedreghen ende daer ghedoluen, half in deerde ende half daer buten ende ouerdecktene met rijse Ende die van sint Truwen ghemissende desen ontfangher, verstonden ommer van sommege lieden dat haerlieder ontfangher met sulc eenen man ghecommen was binnen der stede tsauents vp sinte Bonefacius dach, huyten welcken si quade suspicie hadden vp den seluen Zeeuwe

[fol. CC.lxxv.v]

ende midts desen gheruchte, ende oock midts dat moort ghemeenlick nyet verholen en blijft, so wort desen voorseyde gheuanghen, ende gheuanghen sijnde men ghinc met sijnen slotelen in sijn huys, daermen den voorseyde ontfangher vandt int spindeken deerlick vermoort ligghende. Ende dese voorseyde was om deser moorts wille gheuoert vp eenen waghen, ghebonden aen eenen stake huyter burch ouer den braemberch ouer die Eechout brugghe, also tot ouer die marct ten houcke, ende van daer ouer die plaetse Mauberch weder inden burch, daer hi ende tot meer plaetsen ghegheesselt was dat hem tbloet of liep, twelc hi pacientelic leedt, segghende. Ach slaet stijf ick hebt soe wel verdient, ende was doe terstont onthooft ende sijn lichame vp een rat ghestelt.