Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Item den.xiiij.sten in April voor paesschen soe trocken die van Ghendt huyte wel met.v.of.vi.duysent mannen ter Sluys om vitaelgie.

Ende daer vitaelgie ghecocht hebbende ende gheladen te waghene ende te schepe, so quamen die van Brugghe ende die vanden Damme, ende ghecreghen wel van hem lieden.C.schepen met coorne ende andere vytaelgie binnelanders, ende waren alle ten Damme binnen ghebrocht, ende die van Ghendt trocken thuysewaert metten waghens, maer si daden luttel profijts aen die reyse.

¶ Item den.xxv.sten in April.Anno.xcij.so trac die Capiteyn van Brugghe Tijnteuyle, Typre, Toostende, ende in meer steden int west quaertier, omme te communikierene hoemen dye orloghe voeren soude yeghen die van Ghendt ende die vander Sluys, maer die van Ipre ende die van Rijssele, ende meer andere en waren van gheenen aduijse om yet te gheuene om die orloghe mede te voerene, maer om paeys souden si gheerne mede helpen last draghen.