Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item mijn heere van Nassauwen dit vernemende]

Item mijn heere van Nassauwen dit vernemende, corts daer naer met die van Brugge ende die gaerde die Tardenburch lach, ende die van Cortrijcke metten garnisoene van daer ontrent wel voorsien van gheschotte ende engienen, trocken voor die stede van Dixmude, ende begonsten te stormene vp die voorseyde stede, so varre dat die van Ghendt die binnen der stede waren die stede weder ouer gauen, behouden dies dat si vertrecken moesten in haerlieder wambaeysen ende anders niet, twelcke hem lieden gheconsenteirt was. Ende die gaerde binnen der stede sijnde daden iusticie ouer die ghene die de stede also verraden hadden, maer die capiteyn vanden Damme bleeffer inne, met meer andere, ende die beroofden die stede, ende voerdender huyt groot goet ende vinghen vanden rijcsten dye si mede voerden, daer sy noch groot goet of ghecreghen, so dat ghemeente van Dixmude niet vele en behilt, want die voorseyde duytschen vanden Damme quamen als si van Dixmude quamen met selueren croesen, schalen, lepelen vp huerlieder hoeden ende bonetten hanghende seere vele.

¶ Item es te wetene dat dit garnisoen van den Damme van nyemende en hilden noch van heeren noch van yemant anders, maer roofden ende daden groote schade al tlant duere ende namen al dat sy vonden, also wel ontrent Brugghe als eldere, namen si die schamele lieden haerlieder beesten, ende moestense weder yeghens hem lieden lossen, ende by hem lieden heuet tlant die meeste schade ghehadt onder voren ende naer diet van alle der orloge ghehadt hadde, god wilt hem vergheuen dieser eerst leyde ende inbrochte.