Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[fol. CC.lxxiij.r]

Item vp desen seluen tijt in die maent van Lauwe soe wast seer cout wedere ende seer gheurosen.

Ende binnen der stede van Dixmude waren eeneghe die alianchie maecten met die van Ghendt, so dat si quamen vp eenen nacht naer Dixmude, ende quamen heymelicke tot voor die stede met menichte van volcke, ende wel voorsien ende snachts quamen dye personen ouer thijs, want die vesten ouerurosen waren, ende seyden. Wilt ghy Dixmude hebben tes nv tijt volcht my. Ende die van Ghendt trocken clouckelic ouer die veste, ende sloughen doot tauwet van eender poorte, twelc seer sober was, want si schamel auwet hilden alst bleec Ende tvolc aldus al in ghecommen sijnde, soe wasser een oudt man die liep ter marct ende riep alaerme, ende dye was daer terstont doot ghesleghen.

¶ Item dyt gheruchte hoorende een rijck man vanden Vryen, ghenaemt Cornelis Ioris die lange tijt schepene vanden vryen gheweist hadde, ende meende te commene huyt sijnen huyse om ter marct te gane, ende wort daer ooc doot ghesleghen. Ende die van Ghendt ghinghen terstont ter marct, ende wonnen also die stede van Dixmude, ende si liepen terstont in alle der rijcker lieder huysen, ende vinghense ende ghecreghender grote schat van penninghen ende van yuweelen Ende eeneghe vloden met vele ghelts ende yuweelen duer die veste, die daer mede wech gherochten. Ende daer waren sommege vrauwen die ooc meenden met vele ghelts gheladen hebbende ouer dye veste te commene, maer eer si wech gheraken consten, het was hem lieder weder al ghenomen.