Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item.xxvi.in wedemaent galt een hoet taerwe te Brugghe vier gouden croonen]

Item.xxvi.in wedemaent galt een hoet taerwe te Brugghe vier gouden croonen, ende den coopman manghelde deen goet yeghen dandere, wantter tghelt seer qualick om crijghen was, ende vele volcx vluchte huyter stede van Brugghe ende ghinghen dolen, want si niet te werckene en consten gheuinden, noch daer en was gheen neeringhe, ende veel volcx mans ende vrauwen die in die wulle of draperie wrochten die ghinghen alle verloren, want nyement vanden rijcke lieden en gaf ghelt huyt daer hi mochte, ende schamel lieden dye haer pandekens moesten vercoopen gauen wel dat een pont groot weert was om.vi.schellingen groten, want men cochte doe een pont fijn tins om.iij.groot, ende tkuer om eenen braspenninc yeghen die schamel lieden diet van groter armoeden ende ghebreke vercochten.