Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.xv.sten dach van April.Anno.xci.]

[Item vp den.xv.sten] dach van April.Anno.xci.so was ghebrocht een blochuys huyt Brabant om te stellen in casant, omme twelcke alle die ruyters van Ardenburch trocken met machte in casant, maer als si quamen in Casant si en vonden der niet bouen.xij.persoonen, ende si staken tvier in Casant in diueersche huysen, want het volc van Casant was gheulucht binnen der stede vander Sluys.

[Vp den derden dach van Meye]

¶ Item vp den derden dach van Meye so was dat weerde helich bloet omme ghedreghen metten keersen vanden ambochten al simpelick sonder trompetten, ende thelich bloet was ghedreghen van buyten totter cruyspoorte, ende daer brochtment binnen ende men droucht voort lancx der veste van binnen, ende also weder sinte Baselis naer costume.

¶ Item vp desen seluen tijt die vander gaerde haelden eenen groten roof voor Ghent wel van duysentich coeyen, ende vijnghen wel hondert lantslieden. Ende als doe begonste die orloghe vp Ghent, ende die duytschen die ten Damme laghen liepen ende roofden in Tghendtsche al dat sy ghecrijghen consten.