Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp Sinte kathelijnen dach snachts ontrent den.ij.hueren]

Item vp Sinte kathelijnen dach snachts ontrent den.ij.hueren, so dede mijn heere van Nassauwen met sijnen volcke doen een alaerme vp die stede van Brugghe, schietende vp die speypoorte met.ij.of.iij.engienen, so dat si.ij.of.iij.gaten schoten in die voorseyde speypoorte. Ende die vanden Damme schoten met eenen engiene eenen cloot duer thuys van Vincent van Elsen yeghen ouer thuys van cambron, maer daer en was nyement of ghequetst. Ende daer was gheuonden al bi die carmers kercke eenen yseren cloot, weghende wel xxx.libra, die dye van Damme ooc schoten binnen der stede, maer daer en was nyement mede ghequets. Ende men schoot ooc seere huyter stede naer hem lieden, so datter vele van hem lieden doot bleuen, ende ook seere ghequets.

¶ Ende vp desen seluen dach so trocken sachternoens ontrent den.ij.hueren vele schamele lieden Brugghe van aermoeden, want die vitaelgie wiert lancx so dierdere, ende schamel lieden en vonden niet te winnene,

[fol. CC.lxix.r]

om den cost mede te ghecrijghene, ende elck trac daert hem gheliefde, ende ghinghen alle ter Ghendtpoorte huyt soucken auentueren.

¶ Want een hoet tarwe galt doe.iiij.libra groten, den rugghe.ij.libra groten, ende al ander graen in aduenante van dien. Een libra buetere.xvi.groten, een cabuyscole.iij.groten, een.xxv.eyeren.xxxvi groten, een pont broots.xij.groten, een pont caes viij.groten, eenen stoop wijns.xxx.groten.